Sańnikaŭ: «Chvalujusia, jak Dańka, jak ŭsprymaje «pastajalcaŭ»

Maci eks-kandydata ŭ prezydenty Andreja Sańnikava atrymała jad jaho list, napisany 1 lutaha. Miž tym, adlehłaść pamiž domam Ały Sańnikavaj i KDB, dzie trymajuć jaje syna, ŭsiaho sto metraŭ.

Usiaho ad Andreja Sańnikava pryjšło 4 listy, apošni — paśla bolej jak dvuchtydniovaha pierapynku. Na liście paznačana ličba 7 — heta, vidać, aznačaje, što list pa liku siomy. Dzie padzielisia jašče try listy, nieviadoma Ała Ŭładzimieraŭna na prośbu Svabody pračytała vytrymki ź lista syna.

«Dobry dzień, mama. Voś ad ciabie dajšła jašče adna viestačka. Pryčym śviežaja, ty ŭžo pišaš pra Iru. Viestačka paradavała, a toje, što Ira doma, choć i pad chatnim aryštam, było samaj radasnaj padziejaj za apošni čas. Zaraz, praŭda, chvalujusia, jak tam Dańka, jak usprymaje „pastajalcaŭ“, jak Ira siabie adčuvaje. Usio, što ty pieradaješ, ja atrymlivaju, i nie chvalujsia. Leki, jakija ty raniej pieradavała, taksama atrymaŭ, u tym liku tyja, što prasiŭ niadaŭna. Jany bolš dla prafilaktyki. Dziakuj za pryvitańni. Usim ad mianie taksama vialikija pryvitańni. Sumuju, kaniešnie, vielmi. Ale zaraz, spadziajusia, Dańku budzie spakajniej. Jak zdaroŭje ŭ Alaksieja? (Heta jon pra brata pytajecca). Z bolšaha, chaciełasia b pra ŭsich raspytać, ale nie atrymajecca. Całuju mocna, lublu. Andrej».

Ała Uładzimieraŭna nia vieryć, što syn paprasiŭ leki «dla prafilaktyki», jak jon napisaŭ. Maci palityka zhadała niadaŭniuju infarmacyju ŭ internecie pra toje, jak syna źbivali milicyjanty na płoščy Niezaležnaści 19 śniežnia. «Jaho mahli zabić, bili metanakiravana pa hałavie pałkami», — zhadvaje Ała Uładiźmieraŭna słovy śviedak, jakija byli pobač i ŭratavali jaje syna ad milicyjantaŭ. Toje, što zaraz Andrej nia šmat piša pra svajo zdaroŭje, dla maci nie dziva:

«Jon nie lubić skardzicca i zakranać hetuju temu», — kaža Ała Sańnikava pra syna.

9 lutaha z Andrejem sustrakaŭsia jahony advakat Pavał Sapiełka. Sańnikaŭ pakul nie pačaŭ znajomicca z materyjałami kryminalnaj spravy, pravodziacca śledčyja dziejańni, skazaŭ Sapiełka. Advakat admoviŭsia ad kamentaroŭ u suviazi z padpiskaj pra nierazhałošvańnie tajamnicy śledztva

Ale Sańnikavaj advakat ničoha pra sustreču z Andrejem nie paviedamiŭ. Sama Ała Ŭładzimieraŭna advakatu nie telefanuje.

«Pakul jon mnie ničoha… Viedajecie, advakataŭ hetak prycisnuli, što jany nie iduć na kantakt. Dy ja i sama bajusia. Jašče zabiaruć advakata i budzie jak ŭ Iry…»

Irynu Chalip prymusili admovicca ad pieršaha advakata Uładzimiera Toŭścika, jakomu pahražali tym, što zabiaruć licenziju. Pra heta paviedamili svajaki žurnalistki, jakuju trymajuć pad chatnim aryštam. Paśla hetaha svajaki Chalip zaklučyli damovu z advakatam Tamaraj Harajevaj, ale paźniej jana admoviłasia ad sumiesnaj pracy, spasłaŭšysia na zaniataść. Na hetym tydni dla žonki Sańnikava znajšli novaha advakata.

• 0
• 0
• 0
• 0
• 0
• 0
• 0
• 0