Śledčy paviedamiŭ joj, što hałoŭnaja zadača — heta «raźviančańnie mifa ab tym, što masavyja biesparadki arhanizavali śpiecsłužby».
Paśla nieadnarazovych telefanavańniaŭ pravaabaronca Nasta Łojka pahadziłasia sustrecca sa śledčym kontrvyviedki. Sustreča adbyłasia 15 lutaha i doŭžyłasia 15 chvilinaŭ. Pryčym abiacanaj pozvy Łojka tak i nie dačakałasia, adnak pakolki paabiacała śledčym źjavicca na dopyt, słova svajo vykanała.
Napačatku kapitan vajennaj kontrvyviedki Dzianis Navicki pakazaŭ Łojcy razdrukoŭki ź internetu, dzie pravaabaronca nibyta aceńvaje pracu śledčych jak «…bardak i heta vialikaja śledčaja hrupa nie moža navat skaardynavacca pamiž saboj», pamyłkova paličyŭšy, što słova «bardak» tyčycca kontrvyviedki.
Zatym jon ščyra paviedamiŭ, što samaja hałoŭnaja zadača śledstva pa kryminalnaj spravie ab masavych biesparadkach heta
«raźviančańnie mifa ab tym, što masavyja biesparadki arhanizavali śpiecsłužby».
Nasta Łojka raspaviała, što zatym śledčy prapanavaŭ supracoŭničać sa śledstvam, maŭlaŭ, «Vy dosyć aktyŭny čałaviek i šmat kaho viedajecie, tamu dapamažycie na fota i videamateryjałach apaznać tych asobaŭ, jakija Vam viadomyja».
Pravaabaronca admoviłasia ad prapanovy, spasłaŭšysia na nieakreślenaść statusa pry praviadzieńni śledčych dziejańniaŭ, adsutnaść pratakołu i paniatych.
Niekałki chvilinaŭ Nasta čakała ŭ kalidory, pakul kapitan Navicki raiŭsia pa telefonie ź nieviadomaj asobaj. Tolki paśla hetaha ź joj raźvitalisia sa škadavańniem, što dziaŭčyna admoviłasia ad supracoŭnictva.
Ciapier čytajuć
Voś chto toj chłopiec, jaki pajechaŭ na prapołku bulby i staŭ hierojem sacsietak6
Kamientary