Hienprakuratura zabaronić dzieciam badziacca pa načach
U metach abarony dziaciej ad złačynstvaŭ i pravaparušeńniaŭ, a taksama ŭ suviazi ź nieabchodnaściu spynieńnia złačynnaści niepaŭnaletnich Hienieralnaj prakuraturaj Biełarusi padrychtavany zakonaprajekt, jaki ŭnosić papraŭki ŭ dziejnaje zakanadaŭstva.
Jak paviedamili ŭ Hienprakuratury, prajektam zakona ŭvodzicca zabarona na znachodžańnie niepaŭnaletnich da 16 hadoŭ u hramadskich miescach u načny čas biez supravadžeńnia baćkoŭ (apiekunoŭ), inšych paŭnaletnich členaŭ siamji, blizkich svajakoŭ; asob, jakija sumiesna pražyvajuć; asob, jakija supravadžajuć dziaciej pa prośbie baćkoŭ (apiekunoŭ), a taksama asob, na jakich uskładzienyja abaviazki pa navučańni i vychavańni dziaciej.
Akramia taho, praduhledžvajecca dapaŭnieńnie Kodeksa ab administracyjnych pravaparušeńniach novym artykułam, jaki vyznačaje adkaznaść baćkoŭ ci asob, jakija ich zamianiajuć, a taksama asob, na jakich uskładzienyja abaviazki pa navučańni i vychavańni niepaŭnaletnich, za parušeńnie zabarony na znachodžańnie dziaciej va ŭzroście da 16 hadoŭ u hramadskich miescach u načny čas.
Analiz statystyčnych danych śviedčyć ab tym, što najbolšaja kolkaść pravaparušeńniaŭ učyniajecca niepaŭnaletnimi ŭ viačerni i načny čas. Znachodziačysia na vulicy biez supravadžeńnia i kantrolu darosłych, padletki ryzykujuć svajoj biaśpiekaj, a taksama sami ŭčyniajuć złačynstvy.
U pryvatnaści, u 2010 hodzie niepaŭnaletnimi ŭčyniena 4.777 pravaparušeńniaŭ, ź ich u načny čas (z 22 da 6 hadzin) — 1.867, što składaje 40% ad liku ŭsich učynienych niepaŭnaletnimi pravaparušeńniaŭ.
Raspracavany Hienieralnaj prakuraturaj zakonaprajekt nakiravany zacikaŭlenym dziaržaŭnym orhanam na ŭzhadnieńnie.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej9
Kamientary