Łukašenka nazvaŭ Sańnikava i Chalip hałoŭnymi adkaznymi za biesparadki ŭ Minsku 19 śniežnia

Alaksandr Łukašenka ŭ interv`iu amierykanskamu vydańniu The Wahsington Post nazvaŭ eks-kandydata ŭ prezidenty Andreja Sańnikava i jaho žonku Irynu Chalip, žurnalistku rasijskaj haziety «Novoje vriemia», hałoŭnymi adkaznymi za biesparadki ŭ Minsku 19 śniežnia 2010 hoda. Interv`iu, jakoje Łukašenka daŭ haziecie 28 lutaha, apublikavana 4 sakavika.

Adkazvajučy na śćviardžeńnie interv`iujora, staršaha redaktara haziety Elizabiet Hrechiem Viejmaŭt, pra toje, što padčas vybarčaj kampanii hrašovyja srodki i čas vystupleńniaŭ alternatyŭnych Łukašenku kandydataŭ byli abmiežavanyja, kiraŭnik biełaruskaj dziaržavy zajaviŭ, što sprava nie ŭ časavych abmiežavańniach: «Pytańnie ŭ tym, z čym jany pryjšli na vybary, što jany skazali biełaruskamu narodu. Ničoha, aprača taho, što Łukašenku treba rasstralać, paviesić, ubrać i hetak dalej. Hetaha biełaruski narod nie prymaje. Napeŭna, i amierykancy b heta sustreli ŭ štyki».

Łukašenka skazaŭ, što kali b słužby biaśpieki ZŠA daviedalisia pra sprobu masavych biesparadkaŭ, byli b aryštavanyja sotni tysiač ludziej.

«Nie dumaju», — skazała žurnalistka. «Vy tak nie dumajecie, ale ja heta viedaju», — zapiarečyŭ Łukašenka.

Viejmaut zaznačyła, što adnaho z udzielnikaŭ śniežańskaj demanstracyi pryhavaryli da čatyroch hadoŭ źniavoleńnia i «paviedamlajecca, što terminy dla inšych mohuć dasiahnuć 15 hadoŭ». Na heta Łukašenka adkazaŭ, što takoje mahčyma, pakolki taki zakon.

Aficyjny lidar paviedamiŭ, što maje prava pamiłavać aryštavanych apazicyjanieraŭ, ale pra toje, ci skarystajecca hetym pravam, jon skaža, kali nadydzie čas. Pry hetym, kiraŭnik dziaržavy padkreśliŭ, što tolki sud moža pryniać rašeńnie ŭ dačynieńni da aryštantaŭ.

U adkaz na pytańnie, ci pamiłuje Łukašenka Sańnikava i jaho žonku Chalip, u jakich jość trochhadovy syn, biełaruski aficyjny kiraŭnik zajaviŭ, što čałaviek, u jakoha jość dzieci, pavinien dumać pra ich i pra nastupstvy, pierš čym rabić jakija-niebudź učynki. Jon zajaviŭ, što Sańnikaŭ i Chalip byli aryštavanyja jak «asnoŭnyja ludzi», adkaznyja za biesparadki, i što Chalip była pieraviedziena pad damašni aryšt tolki tamu, što ŭ jaje małoje dzicia.

Paviedamleńni pra toje, što da kandydataŭ u prezidenty, jakija znachodziacca ŭ turmie, nie dapuskalisia advakaty, Łukašenka nazvaŭ adkrytym padmanam. Jon paprasiŭ Viejmaŭt nie chvalavacca pra źniavolenych, tamu što ich los, pavodle jaho słoŭ, u ich ułasnych rukach. Łukašenka taksama paprasiŭ jaje pieradać amierykancam, što jon nie kryvažerny.

«Situacyja vyhladaje žudasnaj», — skazała žurnalistka.

«Jana nie takaja žudasnaja, jak vam moža padacca», — zapiarečyŭ Łukašenka.

Pry hetym kiraŭnik dziaržavy skazaŭ, što «absalutna dakładna» aryštavanyja nie zastanucca ŭ SIZA KDB.

• 0
• 0
• 0
• 0
• 0
• 0
• 0
• 0