U Biełaruś prybyvajuć pieršyja naziralniki ABSIE za chodam sudoŭ pa spravie ab masavych biesparadkach

Pieršyja čatyry naziralniki Biuro pa demakratyčnych instytutach i pravach čałavieka ABSIE pavinny prybyć u Biełaruś 9 sakavika, kab nazirać za chodam sudovych pasiadžeńniaŭ pa spravie ab masavych biesparadkach. Pra heta paviedamiŭ kiraŭnik BDIPČ ABSIE Janiez Lanarčyč.

Naziralniki zmohuć prysutničać na pracesach Dźmitryja Miadźviedzia, a taksama rasijskich hramadzian Ivana Haponava i Arcioma Breusa. Sudovy razbor u dačynieńni da ich budzie adnoŭleny 10 sakavika.

«U jakaści dziaržavy — udzielnicy ABSIE Biełaruś uziała na siabie abaviazacielstva dapuskać mižnarodnych naziralnikaŭ na pasiadžeńni suda. Naziralniki aceniać, nakolki sudovyja pracesy adpaviadajuć nacyjanalnamu zakanadaŭstvu i normam spraviadlivaha sudovaha razboru, što ŭtrymlivajucca ŭ dakumientach ABSIE i jurydyčna abaviazkovych mižnarodnych pahadnieńniach», — cytuje Janieza Lanarčyča pres-słužba ABSIE.

Ekśpierty BDIPČ buduć nazirać za asnoŭnymi sudovymi razborami pa spravie ab masavych biesparadkach, pa vynikach manitorynhu biuro apublikuje spravazdaču.

6 sakavika načalnik upraŭleńnia infarmacyi — pres-sakratar MZS Biełarusi Andrej Savinych paviedamiŭ BiełaPAN, što kraina zaprasiła naziralnikaŭ ABSIE dla ŭdziełu ŭ sudovych pracesach pa spravie ab padziejach 19 śniežnia.

«Biełaruś demanstruje svaju adkrytaść partnioram pa ABSIE. My chočam, kab udzieł źniešnich ekśpiertaŭ paćvierdziŭ, što ŭsie sudovyja pracesy prachodziać u poŭnaj adpaviednaści z nacyjanalnym zakanadaŭstvam», — skazaŭ Savinych.

Nahadajem, abvinavačanymi pa kryminalnaj spravie ab masavych biesparadkach źjaŭlajucca 42 čałavieki. Čaćviora ŭžo asudžany. 17 lutaha sud Frunzienskaha rajona Minska pryhavaryŭ Vasila Parfiankova da čatyroch hadoŭ pazbaŭleńnia voli ŭ kałonii strohaha režymu. 2 sakavika ŭ tym ža sudzie byli vyniesieny pryhavory jašče trom abvinavačanym: Alaksandr Małčanaŭ asudžany na try hady pazbaŭleńnia voli, Dźmitryj Novik — na try z pałovaj, Alaksandr Atroščankaŭ, pres-sakratar kandydata ŭ prezidenty na vybarach-2010 Andreja Sańnikava, — da čatyroch hadoŭ. Jany buduć adbyvać pakarańnie ŭ kałonii ŭzmocnienaha režymu.

31 śniežnia 2010 hoda Biełaruś prainfarmavała členaŭ Pastajannaha savieta ABSIE ab rašeńni nie pradaŭžać mandat minskaha ofisa arhanizacyi ŭ suviazi z «adsutnaściu abjektyŭnych padstaŭ dla zachavańnia misii».

Na dumku palitołahaŭ, pryčynaj zakryćcia ofisa stała niehatyŭnaja acenka pradstaŭnikami ABSIE vynikaŭ prezidenckich vybaraŭ u Biełarusi.

• 0
• 0
• 0
• 0
• 0
• 0
• 0
• 0