Alehu ź Niamihi, jaki paciarpieŭ ad milicyi, sabrali dva miljony ciaham dnia

Na praciahu dnia biełarusy sabrali kala dvuch miljonaŭ rubloŭ u dapamohu Alehu, jaki 25 maja zastupiŭsia za studenta-bieźbiletnika na prypynku kala handlovaha doma «Na Niamizie».

Nahadajem, u vyniku kanfliktu z revizoram «Minsktransa» i supracoŭnikami milicyi mužčynu abaviazali vypłacić štraf u 700 tysiač. Spačatku jaho aktyŭna baranili ludzi ŭ aŭtobusie i na prypynku: daviedzienyja da rospačy rostam cenaŭ, ludzi aburalisia dziejańniami ŭładaŭ.

Daviedaŭšysia pra takoje raźvićcio padziej,

u sacyjalnych sietkach aktyŭna padchapili inicyjatyvu sabrać u dapamohu Alehu srodki na apłatu štrafu. Sabranaja suma ź lichvoj jaho pakryje.

Navinu ab bojcy ź milicyjaj na Niamizie aktyŭna abmiarkoŭvali na forumach i ŭ sacsietkach. Kali źjaviłasia infarmacyja ab tym, što Aleha aštrafavali, dziasiatki ludziej adhuknulisia z žadańniem akazać jamu materyjalnuju dapamohu. Vyniki arhanizavanaj u sacsietkach akcyi pa zbory srodkaŭ, miakka kažučy, ździvili. Tak, tolki z dapamohaj Twitter za 4 hadziny było sabrana bolš za 1 młn 290 tysiač rubloŭ. Niamała sabrali taksama błohiery.

A 18.30 na prypynku na Niamizie, dzie 2 dni tamu i adbyłasia bojka, sabrałasia kala tryccaci čałaviek, jakija pažadali asabista pieradać Alehu srodki, skazać słovy padziaki i pacisnuć ruku. Źlohku źbiantežany, Aleh dziakavaŭ minčukam, jakija padychodzili da jaho sa słovami: «Aleh, viedajcie, što vy nie adzin», «Dziakuj, što vy jość», «Dziakuj za hramadzianskuju pazicyju», «Vy ŭskałychnuli krainu», «Možna pacisnuć vam ruku».

chvilin praz 15, sa źjaŭleńniem ludziej u cyvilnym, usie razyšlisia.

— Dziakuj usim vializny, siabry, ja uzrušany. Ja nijak nie čakaŭ takoha efiektu, ščyra kažučy, usiaho tolki chacieŭ dapamahčy čałavieku, — dziakavaŭ Aleh usim prysutnym. — Kali bačyš biaźmiežža z boku kantraloraŭ, zaŭsiody chočacca dapamahčy…

— Jak dumajecie, čamu ludzi stali na vaš bok?

— Musić, kali ja lažaŭ na ziamli, usie dumali, što heta ja nie apłaciŭ prajezd. Mabyć, u kožnaha zdaralisia takija situacyi, kali kantralor patrabavaŭ apłaty štrafu na miescy, choć raźbisia, ale apłaci. A tut jašče milicyja, heta ludziej i začapiła. Mabyć, byŭ niejki precedent, — razvažaje Aleh.

— Apratestoŭvać rašeńnie suda ja nie budu. Zrazumieła, što milicyja pracavała jak śled, jana zatrymlivała parušalnika, jaki nie padparadkavaŭsia joj.

— Jak vydatkujecie sabranyja dla vas srodki?

— Apłaču štraf, a reštu… Zaŭsiody jość ludzi, jakija majuć patrebu ŭ dapamozie, u ich jość rachunki…

Jak paviedamiŭ Aleh, sam jon jeździć z prajaznym, pracuje ciapier razvozčykam vady.

— Što budziecie zaraz rabić?

— Chaču kupić sabie barvovuju kašulu, takuju ​​ž, u jakoj byŭ tady — tuju pamyŭ i pakinu jaje jak relikviju, na pamiać.

Pravodzili Aleha apładysmientami.

• 0
• 0
• 0
• 0
• 0
• 0
• 0
• 0