Rytuały chłuśni

Biełarusy ź Litvy vyvoziać usio, što mohuć vyvieźci: harbatu, kavu, syry, alej, pralnyja paraški, pampiersy, budmateryjały… Pryčym, litoŭcy radyja, što na pryłaŭkach ničoha nie zaležvajecca. Jany nie tolki nie źbirajucca ŭvodzić abmiežavańni na vyvaz tavaraŭ hetym našeściem pakutnikaŭ z susiedniaha psieŭdaraju, ale navat vydajuć biełarusam nazapašvalnyja kartki, jakija dajuć prava na vialikija źnižki.

Biełaruś, naadvarot, uviała abmiežavańni na vyvaz tavaraŭ. Vyvieźci možna nie bolš za dva kiłahramy miasa ci, naprykład, kiłahram masła. I nasamreč heta dyjahnaz. Tamu što kali ekanomicy krainy niavyhadna, kab kuplałasia pradukcyja, zroblenaja na jaje zavodach, to heta nie ekanomika, a kiepska prychavanyja rytuały chłuśni vakoł niejkaj psieŭdaidei. U našym vypadku chłuśnia zaklikanaja padtrymlivać mif pra pośpiechi biełaruskaha dziaržaŭnaha budaŭnictva i prykryvać tuju jamu, da jakoj my pryjšli pad apładysmienty Usiebiełaruskich narodnych schodaŭ hałoŭnamu dakładčyku.

Pryčym samaja niebiaśpiečnaja chłuśnia — heta kali padmanvaješ sam siabie. Nam kažuć, što ŭ susiedziaŭ usio tak doraha, što jany, byccam našeście sarančy, ciapier źmiatajuć usio ź biełaruskich kramaŭ. A ja vam raskažu inšuju historyju. Maje znajomyja-piensijaniery vyrašyli zakupicca praduktami i napojami na lecišča. Napojami ŭ samym biaskryŭdnym sensie hetaha słova — haziroŭkaj i minieralnaj vadoj. I što vy dumajecie?

U vyniku jany nakuplali šmat litraŭ małaka 1,5-pracentnaj tłustaści (bałazie, jano ciapier niekalki miesiacaŭ nie psujecca), tamu što małako vyjaviłasia… tańniejšym za vadu.

Jak takoje moža być? Jak moža być, kab vada, jakuju prosta vypampavali z-pad ziamli i raźlili pa butelkach, kaštavała daražej, čym małako? Kali vada ŭ nas prosta jość, i nijakich asablivych namahańniaŭ ni pa jaje pošuku, ni pa jaje zdabyčy rabić nie treba. A voś karovu treba spačatku vyhadavać, a potym karmić, daić, lačyć, źbirać heta samaje małako, niekudy vieźci, sterylizavać, pierapracoŭvać, płacić zarpłatu ludziam, jakija na ŭsich hetych etapach z małakom važdalisia, i hetak dalej, i hetak dalej.

Kaho my hetymi cenami padmanvajem? Chto ŭ zdarovym rozumie pavieryć, što pry narmalnaj ekanomicy małako nasamreč moža kaštavać tańniej za vadu? Užo bolš sumlenna prosta vydavać biełarusam biaspłatnaje małako za škodnaść žyćcia ŭ takich umovach, ale nie vystaŭlać nikoha idyjotami.

Naohuł, chłuśnia — strašnaja źjava. Jana zaŭsiody pačynajecca z maleńkaj biaskryŭdnaści, ale maje ŭnikalnuju patrebu ŭ samarepradukcyi i razrastańni. Kali chočacie, heta rakavaja puchlina jak čałaviečych adnosin, tak i hramadska-palityčnych farmacyj. Adnosiny dvaich ludziej, pabudavanyja na chłuśni, rana ci pozna buduć sapsavanyja nazaŭždy. Ale dakładna z toj ža pryčyny buracca, zdavałasia b, niepachisnyja ŭzajemaadnosiny ŭ źviazku hramadstva — dziaržava.

Naprykład, moj asabisty kanflikt ź dziaržavaj — pijanierki-kamsamołki-aktyvistki — pačaŭsia praz tualetnuju papieru. Nu, nie mahła ja pryniać viersiju «vialikaj dziaržavy», pra jakuju nam raskazvali i na ŭrokach, i pa televizary, i z usich haziet, kali bačyła na vulicach ludziej, abviešanych hetymi rułonami. Nu, nie ŭkładałasia ŭ mianie ŭ hałavie, što nasamreč moža być vialikaj dziaržava, dzie tualetnaja papiera — deficyt!

Voś, što b ni kazali pra Pieramohu ź vialikaj litary i pra Haharyna, ale nielha hanarycca krainaj, jakaja nie zdolnaja zabiaśpiečyć ludziam samaje nieabchodnaje.

U Biełarusi ciapier adbyvajecca niešta padobnaje, asabista ŭ mianie adčuvańnie poŭnaha dežaviu z časami SSSR napiaredadni raspadu. Užo ŭsie ŭsio razumiejuć. I prosta čakajuć, kali heta skončycca. Choć pa inercyi ideołahi jašče kažuć staryja pramovy, televizar usio hetak ža viaščaje pazityŭnyja «ŭnutranyja naviny» i raskazvaje pra ŭsiakija kataklizmy ŭ susiedziaŭ, ułady dałdoniać pra kansalidacyju hramadstva i padtrymku naroda.

Ale narod užo daŭno sam za siabie: nikomu nie vieryć, zapasajecca dalarami i praduktami praciahłaha zachoŭvańnia, pje małako zamiest vady i, zaŭvažcie, uładu za heta nie chvalić, tamu što tak nie pavinna być, heta niapravilna.

• 0
• 0
• 0
• 0
• 0
• 0
• 0
• 0