Aktyvistki Femen raździelisia kala biełaruskaha KDB

19 śniežnia ŭ Minsku kala budynka KDB aktyvistki Femen praviali akcyju, prymierkavanuju da hadaviny padziej Płoščy. Jany raździelisia i razharnuli płakaty z nadpisami «Žyvie Biełaruś!»

Dziaŭčaty mieli namalavanyja na tvary vusy, u adnoj ź ich na śpinie byŭ namalavany Łukašenka.

Potym z budynka KDB vybiehła achova i zatrymała videaapieratara «NN» Taćcianu Haŭrylčyk, niezaležnaha fatohrafa Juliju Daraškievič i jašče adnu žurnalistku, imia jakoj pakul nieviadoma.

Dziaŭčaty z Femen paśpieli źbiehčy z-pad budynka.

Naš reparcior pieradaje, što pobač z budynkam KDB prahulvajucca Niaklajeŭ ź Dźmitryjevym. Busik sa śpiecnazam i mašyna DAI padjechali praz 15 chvilin paśla akcyi.

Dziaŭčatam-ukrainkam udałosia zachavać miesca akcyi ŭ tajamnicy. Jany padzialilisia infarmacyjaj tolki ŭ sacyjalnych sietkach, u vyniku čaho žurnalisty viedali pra budučuju akcyju, a śpiecsłužby nie paśpieli zreahavać. Kab nie dać mahčymaści sarvać pierformans, ukrainki byli abvieścili, što adrakajucca idei pryjezdu ŭ Minsk i praviaduć svaju śpiecyfičnuju akcyju salidarnaści ŭ Kijevie. Adnak, jak vyjaviłasia, ich płan byŭ dziorzki.

Jakim čynam Femen-istkam udałosia tak chutka raździecca, a paśla ŭciačy? Žurnalistka NN była śviedkam taho, jak heta adbyvałasia.

Dzieści kala 11.05 nasuprać budynka KDB litaralna na siekundu spyniłasia mašyna, ź jakoj vyskačyli try dziaŭčynki ŭ palito i šapkach.

Na biahu jany za ličanyja siekundy skinuli ź siabie vopratku prosta na asfalt.

Jany schapili płakaty i ŭstali nasuprać budynka KDB. (Za hetym naziraŭ ździŭleny rabočy, što zavichaŭsia z drabinaj kala kałanady.) Niekalki chvilinaŭ Femen spakojna i biespakarana kryčali «Žyvie Biełaruś», mianialisia płakatami i paziravali pierad žurnalistami.

Praz paru chvilinaŭ jany padnialisia na prystupki budynka, praciahvajučy kryčać na ŭvieś praśpiekt. Z budynka narešcie vyskačyŭ achoŭnik.

Vajskoviec pahladzieŭ na namalavany partret Łukašenki na śpinie dziaŭčyny, pieradaŭ niešta pa racyi i da jaho pačali dałučacca inšyja achoŭniki z budynka.

Kadebisty najpierš pačali chapać žurnalistak i ciahnuć da bakavoha ŭvachoda ŭ budynak.

Achoŭniki padbirali ź ziamli tyja elemienty vopratki, jakija nie paśpieli na siabie nadzieć Femen-ki

«My zdoleli źbiehčy, chacia, kali my źviarnuli za roh, nas spynili milicyjaniery, — raskazali jany ŭ intervju Jeŭraradyjo. — Jany byli nastolki šakavanyja našym vyhladam — nie zrazumieli, chto my takija, čamu ŭ nas taki vyhlad… Razhubilisia, i tamu adpuścili nas, pra što, ja dumaju, ciapier vielmi škadujuć».

Chronika padziej

11.22

Śpiecnazaŭcy pačynajuć čaplacca da ŭsich, chto staić z telefonami.

11.23

Taćciana Haŭrylčyk pieradaje, što ich trymajuć u budynku KDB, čakajuć śpiecyjalistaŭ, jakija majuć vycierci ich fota- i videazapisy.

13.43

Stała viadomym imia treciaj zatrymanaj žurnalistki. Heta Kici Hryn, hramadzianka Aŭstralii. Pra heta piša błoh supołki Femen.

14.22

Infarmacyja, što ŭkrainak zatrymali, nie paćvierdziłasia.

14:55

Milicyja nie zatrymała paŭaholenych dziaŭčat z Femen, kali tyja biehli mima.

«My zdoleli źbiehčy, chacia, kali my źviarnuli za vuhał, nas spynili milicyjaniery. Jany byli nastolki šakavanyja našym źniešnim vyhladam — nie zrazumieli, chto my takija, čamu ŭ nas taki źniešni vyhlad… Razhubilisia, i tamu adpuścili nas, pra što, ja dumaju, ciapier vielmi škadujuć».

* * *

Adzin z čytačoŭ na sajcie NN paraŭnoŭvaje akcyju Femen la KDB z pryziamleńniem Macijasa Rusta na Krasnaj płoščy ŭ 1987 hodzie.

«Samalot «Sesna», pralacieŭšy ŭvieś Saviecki Sajuz, sieŭ na Krasnaj płoščy:)», — piša aŭtar kamienta.

• 0
• 0
• 0
• 0
• 0
• 0
• 0
• 0