Ministry zamiežnych spravaŭ krainaŭ ES havorać pra «čorny śpis» biznesoŭcaŭ.
Pra heta raskazaŭ słavienski ministr Karł Erjaviec, jaki 9–10 sakavika braŭ udzieł u niefarmalnym samicie ES u farmacie «Himnich» u Kapienhahienie. U intervju słavienskim ŚMI Erjaviec, u pryvatnaści, raspavioŭ pra šyrokuju dyskusiju na temu vykarystańnia sankcyj u dačynieńni da Biełarusi, Irana i Siryi.
Spasyłajučysia na nieaficyjnuju infarmacyju,
Erjaviec adznačyŭ, što praz dva tydni na čarhovaj pracoŭnaj sustrečy kiraŭnikoŭ MZS buduć abmierkavanyja sankcyi ŭ dačynieńni da kiraŭnikoŭ tych biełaruskich kampanij dy biznesoŭcaŭ, jakija padtrymlivajuć režym Łukašenki.Słavienski ministr adznačyŭ, što ŭ hety śpis uvojdzie nie tolki Jury Čyž, jaki supracoŭničaje ź lublanskaj kampanijaj Riko (nie tak daŭno firma atrymała ŭ Biełarusi budaŭničy kantrakt na 100 miljonaŭ jeŭra).
Padčas svajho vystupu ŭ Kapienhahienie Erjaviec skazaŭ, što ES patrebnaja ahulnaja stratehija ŭ spravie ekanamičnych sankcyj u trecich krainach, i hetyja sankcyi nie pavinny zakranać intaresy tolki adnoj krainy ES
Erjaviec mieŭ na ŭvazie epizod, jaki ŭźnik na lutaŭskim samicie jeŭrapiejskich ministraŭ u Bruseli. Tady Lublana zabłakavała ŭklučeńnie kandydatury Čyža ŭ śpis biełaruskich čynoŭnikaŭ, suprać jakich treba ŭžyć sankcyi, maŭlaŭ, Čyž — adziny biznesoviec u tym pieraliku, chacia daloka nie adziny siarod pradprymalnikaŭ, jakija padtrymlivajuć režym Łukašenki:
«My padtrymlivajem sankcyi, kab praduchilić parušeńni pravoŭ čałavieka, ale my pavinny zabiaśpiečyć paśladoŭny padychod, kab ekanamičnyja sankcyi, kali jany buduć uzhodnienyja, byli efiektyŭnyja», — patłumačyŭ Karł Erjaviec.
U intervju słavienskim žurnalistam, ministr adznačyŭ, što na «Himnichu» ŭ Kapienhahienie jaho pazicyja była sustretaja z razumieńniem i nie vyklikała krytyki z boku kalehaŭ.
U adroźnieńnie ad pasiadžeńniaŭ Rady ŭ zamiežnych spravach ES, u farmacie «Himnich» aficyjna ŭzhodnienyja rašeńni nie vynosiacca.
Kamientary