Baćka Małčanava: Ja b moža i sam na Płošču pajšoŭ by — videa

Baćki Alaksandra Małčanava — Valeryj Uładzimieravič i Halina Andrejeŭna — žyvuć u Barysavie ŭ draŭlanaj chacie. Paśla prysudu ichniamu synu jany zhadzilisia na interviju ŭ pakoi Alaksandra.

Były palitźniavoleny Alaksandr Małčanaŭ siońnia, 9 krasavika, byŭ asudžany na paŭtara hoda kałonii strohaha režymu. Takoje rašeńnie vynies 9 krasavika Žodzinski haradski sud.

Pavodle słoŭ pravaabaroncy Nasty Łojki, Małčanaŭ abvinavačvaŭsia pa č. 2 art. 205 Kryminalnaha kodeksa (kradziež, učynieny paŭtorna, abo hrupaj asob, abo z praniknieńniem u žyllo). Nibyta jon razam z Arciomam Ihnacikavym vykrali mietałałom z terytoryi žodzinskaha kavalskaha zavoda ciažkich štampovak. «Paśla taho jak Małčanava asudzili pavodle padziej 19 śniežnia 2010 hoda, jon nie moža nikudy ŭładkavacca na pracu. Jaho nikudy nie biaruć, niahledziačy na toje što raniej jon pracavaŭ na Barysaŭskim ramontna-miechaničnym zavodzie, „Hidraŭzmacnialniku“ i BATE. Zbor mietałałomu — heta adziny jaho sposab zarabotku», — zaznačyła Łojka.

Jana taksama raspaviała, što Małčanaŭ svaju vinu nie pryznaŭ. «Pavodle jaho słoŭ u sudzie, terytoryja zavoda nie achoŭvałasia. Jon ličyć abvinavačańnie nieabhruntavanym i niespraviadlivym. Šmat śviedak paćvierdzili, što i raniej na terytoryi cecha ludzi źbirali mietałałom. I słužba achovy nikoha nie zatrymlivała», — skazała Łojka.

U apošnim słovie Małčanaŭ ukazaŭ na toje, što śledstva nie dakazała, što mietaličnyja adchody źjaŭlajucca abstalavańniem pradpryjemstva. «Aprača taho, prapanoŭvajučy pazbavić mianie voli, dziaržaŭny abvinavaŭca nie ŭličyŭ, što, kali mnie pryznačać pazbaŭleńnie voli, maje niepracazdolnyja baćki zastanucca biez apieki», — skazaŭ Małčanaŭ.

Arcioma Ihnacikava sud pryhavaryŭ da paŭtara hoda pazbaŭleńnia voli z adterminoŭkaj pryhavoru na hod.

Jak paviedamiła Łojka, advakaty Ihnacikava i Małčanava buduć abskardžvać pryhavor u Minskim abłasnym sudzie. Maci Małčanava atrymała ad sudździ dazvoł na sustreču z synam.

Małčanaŭ braŭ udzieł u akcyi suprać falsifikacyi vynikaŭ vybaraŭ 19 śniežnia 2010 hoda. Byŭ zatrymany 6 studzienia 2011 hoda ŭ siabie doma ŭ Barysavie. Abvinavačvaŭsia va ŭdziele ŭ masavych biesparadkach i ŭ źniavazie dziaržaŭnych simvałaŭ Biełarusi.

2 sakavika 2011 hoda sudździa Frunzienskaha suda Minska Taćciana Čarkas za ŭdzieł u padziejach 19 śniežnia 2010 hoda asudziła Małčanava na try hady źniavoleńnia ŭ kałonii ŭzmocnienaha režymu. Jon adbyvaŭ pakarańnie ŭ kałonii № 15 Mahilova, ale 14 vieraśnia 2011 hoda byŭ vyzvaleny zhodna z ukazam Alaksandra Łukašenki ab pamiłavańni.

• 0
• 0
• 0
• 0
• 0
• 0
• 0
• 0