Viarchoŭny sud admoviŭ usim. Akramia eks-kandydata ŭ prezidenty Ciareščanki

Uviečary 6 vieraśnia Viarchoŭny sud Biełarusi zaviaršyŭ razhlad skarhaŭ niezarehistravanych kandydataŭ u deputaty Pałaty pradstaŭnikoŭ piataha sklikańnia.

Sud admoviŭ moładzievamu aktyvistu Arturu Fińkieviču i aktyvistu kampanii «Havary praŭdu» Michasiu Paškieviču.

Takim čynam, z 19 zvarotaŭ zadavoleny tolki adzin — byłoha kandydata ŭ prezydenty Viktara Ciareščanki. Čatyry hady tamu, na papiarednich vybarach, skarhaŭ taksama było 19, ale tady zadavolili dźvie.

​​Michaś Paškievič na siońniašnim pasiadžeńni asabista nie prysutničaŭ. Jamu daviałosia źjechać ź Miensku ŭ paniadziełak pa siamiejnych spravach, i viarnucca na sud jon nie paśpiavaje. A asabistaja prysutnaść albo adsutnaść na rašeńnie ŭsio roŭna nie paŭpłyvała b — upeŭnieny jon:

«My išli na hetyja vybary nie jak na sapraŭdnyja vybary, nie dla taho, kab stać deputatami. My ž cudoŭna razumiejem, dzie žyviem. I tamu my išli na vybary, kab pa maksymumie skarystać mažlivaści, jakija daje vybarčaja kampanija.

I, ščyra, ja absalutna nie zasmučany takim rašeńniem. Majo sumleńnie pierad samim saboj čystaje. Ja viedaju, što my sabrali paŭtary tysiačy sapraŭdnych podpisaŭ, što my sabrali ich adnymi ź pieršych. I ja cudoŭna viedaju, jak pilna my ich praviarali. Mnie važna było padčas kampanii davieści samomu sabie — ci zdatny ja vykanać minimalnyja patrabavańni da kandydata? Maje sumleńnie čystaje. Ja liču, što vykanaŭ hetuju pracu dobra».

Za niekalkimi pracesami ŭ Viarchoŭnym sudzie naziraŭ juryst Pavał Sapiełka. Jon padzialiŭsia svaimi mierkavańniami:

​​«U pryncypie razhlad spraŭ u Viarchoŭnym sudzie byŭ pa formie i źmieście vielmi padobny da vybarčaj kampanii. To bok

bačnaść zakonnaści, bačnaść zachavańnia sudovych pracedur isnuje, byccam by hetyja pracedury niejkim čynam zachoŭvajucca. Adnak na vychadzie ŭsio roŭna atrymlivajecca toje rašeńnie, jakoje ŭ vialikaj stupieni adlustroŭvaje ahulny stan vybarčaj systemy. I ahulny stan zachavańnia pravoŭ udzielnikaŭ vybarčaha pracesu».

Svaju dumku spadar Sapiełka padmacoŭvaje kankretnym prykładam z razhladu skarhi niezarehistravanaha kandydata ŭ deputaty Siarhieja Parsiukieviča:

«Sud vielmi jaskrava pakazaŭ, što Vybarčy kodeks u nas to pracuje, to nie pracuje, što dla adnych kandydataŭ jon pracuje tak, a dla inšych — inakš. Tak, na apošnich prezydenckich vybarach podpisy za adnaho vielmi viadomaha kandydata źbirali nie siabry jaho inicyjatyŭnaj hrupy. I kali ich na hetym złavili, to naradziłasia pastanova CVK, pavodle jakoj źbirać podpisy dazvalajecca nie siabram inicyjatyŭnaj hrupy. A siabry mohuć paśla stavić svaju vizu na takich arkušach. Heta prykład taho, jak CVK, pa sutnaści, parušyła normy kodeksu, kab dahadzić adnamu kandydatu.

Hetyja praviły pavinny byli raspaŭsiudzicca i na ŭsich inšych udzielnikaŭ vybarčaha pracesu. Adnak u Viarchoŭnym sudzie razhladajecca skarha spadara Parsiukieviča i zajaŭlajecca, što parušeńniem jość zbor podpisaŭ nie čalcom inicyjatyŭnaj hrupy.

Tamu adrazu chaciełasia zadać pytańnie: čamu dla adnych kandydataŭ adny patrabavańni, a dla inšych — inšyja? Praviły hulni pavinny być identyčnymi dla ŭsich».

• 0
• 0
• 0
• 0
• 0
• 0
• 0
• 0