"Mirny atam": a što pakazvaje palityčny dazymetar?
Z hledzišča tutejšaha načalstva kudy ni kiń — usiudy klin. I tyja, i tyja, bač, prapanujuć, jak savieckija handlary, tavar z nahruzkaj :) Pryčym palityčnaj. Piša ŭ svaim błohu Alaksandar Kłaskoŭski.
Voś pišuć, što Siamaška, mahčyma, pajechaŭ u Kitaj pa AES. Naŭrad ci heta całkam karektnaje śćvierdžańnie. Kitajcy svaju jadravuju enerhietyku raźvivajuć z zamiežnaj dapamohaj, i na viadučych rolach tam Rasieja. Maskva i biełaruskamu kiraŭnictvu ruki vykručvaje, kab mienavita ŭ jaje zamovili "mirny atam".
Pamiatajecie, na presavaj kanferencyi 12 krasavika Alaksandar Łukašenka pryznaŭsia: rasiejcy navat razryvam stasunkaŭ pahražajuć. Ale zachodniki pavodziać siabie jašče bolej nachabna: bač, staviać umovaj raźniavoleńnie medyjaŭ dy źmianieńnie vybarčaha zakanadaŭstva!
Uvohule ž vybar nievialiki. Realna zamovu mohuć atrymać abo francuskaja "AREVA", abo rasiejski "Atambudekspart" (nu, tearetyčna fihurujuć jašče japoncy dy čechi). Francuzy robiać bolej nadziejnyja reaktary, ale i hrošaj biaruć razy ŭ paŭtara bolej, čym rasiejcy.
Zrešty, litoŭcy, jakija taksama źbirajucca zamaŭlać enerhabloki, niadaŭna vusnami ambasadara Bahdonasa prapanavali nam skaaperavacca, kab atrymać u francuzaŭ źnižku. Kažuć, možna źbić košt adsotkaŭ na tryccać. Ale tut užo ŭ našaha načalstva spracoŭvajuć, musić, palityčnyja zaściarohi. Z hetymi zachodnikami tolki źviažysia — koś-koś i ŭ ahłobli!
Rasiejskija ahłobli, va ŭsiakim razie, bolej zvykłyja. Hladziecie, jak reklamuje pasłuhi ichni ambasadar Surykaŭ: maŭlaŭ, jašče i kredyt pad budaŭnictva dadzim!
Darečy, sa słoŭ našaha eksperta Leanida Zaiki, rasiejskamu kiraŭnictvu najlepiej, kab u Biełarusi AES uvohule nie było. Bo hety prajekt tak ci inačaj asłablaje enerhietyčnuju zaležnaść ad Rasiei. Ale pakolki Łukašenka navažyŭsia surjozna, dyk kryŭdna budzie jašče i addać kuš francuzam.
Zrešty, palitolah Andrej Fiodaraŭ nie vyklučaje, što ŭ vypadku rezkaha abvastreńnia stasunkaŭ z Kramlom AES mohuć zamović i zachodnikam. Tym bolej što, na dumku maskoŭskaha analityka Suzdalcava, Rasieja voźmiecca za prajekt tolki na ŭmovach nastupnaha žorstkaha kantrolu nad abjektam. Maŭlaŭ, dostup da reaktara biełaruskim uładam ź ich palityčnymi pavodzinami Kreml davać nia zhodzicca.
Karaciej, z hledzišča tutejšaha načalstva kudy ni kiń — usiudy klin. I tyja, i tyja, bač, prapanujuć, jak savieckija handlary, tavar z nahruzkaj :) Pryčym palityčnaj.
Leanid Zaika ličyć, što Miensk moh by "zrabić pryhoža". Na praktycy prademanstravać šmatvektarnaść. Chaj by pracavaŭ kansorcyŭm: niešta robiać zachodniki, niešta — rasiejcy.
Ale pryhoža moža nie atrymacca. Kali Maskva pastavić pytańnie rubam, dyk u Miensku, badaj, zdaducca. Rasiejski "mirny atam", musić, padajecca ŭsio ž bolej biaśpiečnym palityčna. Tyja chłopcy, va ŭsiakim razie, nia buduć patrabavać svabody medyjaŭ dy inšaj liberalnaj łuchty. Sami jaje tryvać nia mohuć.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary