U Miensku nieviadomyja złamyśniki skrali aerastat

Nieviadomyja złamyśniki skrali aerastat, što byŭ pryviazany na dachu vystavačnaha kompleksu ŭ Minsku. Incydent adbyŭsia ŭ noč z 24 na 25 krasavika ŭ futbolnym maniežy, pieraabstalavanym ŭ vystavačnuju placoŭku na čas praviadzieńnia 14‑j mižnarodnaj śpiecyjalizavanaj vystavy «tibo».

U «tibo'2007» udzielničajuć bolš za 120 ekspanientaŭ ź Biełarusi, Hiermanii, Rasii, Šviejcaryi, Šviecyi i inšych krain, viadučyja suśvietnyja vytvorcy telekamunikacyjnaha abstalavańnia i viadomyja kampanii, pradstaŭlenyja na IT‑rynku krainy. U ich liku — adzin ź lideraŭ biełaruskaha interniet‑rynku TAA «Adkryty kantakt». Mienavita heta kampanija i zapuściła ŭ nieba nad maniežam šaścimiatrovy rekłamny aerastat.

Pavodle słoŭ dyrektara kampanii Andreja Ivanova, pavietrany šar byŭ pryviazany da samaha dachu vystavačnaha paviljona i łunaŭ na vyšyni kala 30 mietraŭ. «Pad lohkim pavievam vietru jon to kružyŭsia, to nakiroŭvaŭ svoj nos u nieba, jak by imknučysia vyrvacca. Uvieś pieršy dzień vystavy jon zabaŭlaŭ raziavak svaimi piruetami, a ŭ noč na sieradu chtości zrezaŭ jaho. Tak i palacieŭ u ciemru, — raskazaŭ BiełaPAN A.Ivanoŭ. — Škada. Kali ŭžo lacieć, dyk lepš dniom. Choć by dzieci paradavalisia svabodnamu palotu. Startu, tak by mović».

Viečaram 24 krasavika pradstaŭniki «Adkrytaha kantaktu» chacieli zanieści aerastat da ranku ŭ paviljon, ale arhanizatary vystavy skazali, što budynak režymny, dobra achoŭvajecca i šar nie prapadzie. Adnak ranicaj akazałasia, što try trosy, jakija ŭtrymlivali aerastat na pryviazi, akuratna pierarezany, a sam jon źnik. «Padobna, što palacieŭ jon na Zachad: viecier byŭ z uschodu», — ličyć A.Ivanoŭ.

Načalnik achovy vystavy paraiŭ paciarpiełym źviarnucca ŭ milicyju, adznačyŭšy, što aerastat byŭ raźmieščany «pa vusnaj damoŭlenaści» i akt ab pryniaćci jaho pad achovu adsutničaje. A pradstaŭniki administracyi futbolnaha manieža prapanavali prahladzieć zapisy kamier nazirańnia pa pierymietry budynka, adrazu papiaredziŭšy, što na dachu manieža takich kamier niama.

«My naŭrad ci budziem zajmacca pošukami našaha «dyryžabla», bo paśla vystavy jon nam užo nie budzie patrebny, — reziumavaŭ A.Ivanoŭ. — Dobra było b, kali b chto‑niebudź pazvaniŭ abo napisaŭ nam ab tym, kamu moh spatrebicca aerastat i kudy jon zmoh dalacieć».

Jak paviedamili BiełaPAN u kamandavańni VPS i vojskaŭ SPA Biełarusi, vajennyja nie majuć nijakaj infarmacyi pra los pavietranaha šara.

• 0
• 0
• 0
• 0
• 0
• 0
• 0
• 0