Kurskaja karparacyja «HriNN» zbuduje ŭ Biełarusi čatyry hipermarkiety «Linija». U našu krainu kampanija trapiła dziakujučy padtrymcy hubernatara vobłaści Alaksandra Michajłava, jaki maje siabroŭskija adnosiny ź biełaruskim kiraŭnictvam.
Kurskaja karparacyja «HriNN» planuje zbudavać u abłasnych centarach Biełarusi čatyry hipermarkiety «Linija». Kožnaja krama abydziecca kampanii ŭ $16,3 młn. Eksperty papiaredžvajuć kurskuju kampaniju ab niepaźbiežnych prablemach, paviedamlaje «Kommiersant»
U Homieli «HriNN» užo atrymaŭ placoŭku ŭ 3 ha pad pieršuju kramu, vyjhraŭšy konkurs na doŭhaterminovuju arendu (99 hadoŭ) ziamielnaha nadziełu bolš čym za $1 młn. Krama raźmieścicca na vulicy Chatajeviča i budzie pabudavanaja za adzin hod. U Homieli majuć zbudavać dva hipermarkiety, a taksama pa adnym u Viciebsku i Mahilovie. Pavodle uładalnika karparacyi «HriNN» Mikałaja Hrašyłava, u Biełaruś kampanija patrapiła dziakujučy padtrymcy hubernatara Kurskaj vobłaści Alaksandra Michajłava, jaki maje siabroŭskija adnosiny ź biełaruskim kiraŭnictvam.
Kankurenty dy eksperty nie padzialajuć aptymizm kiraŭnika kurskaj kampanii. Tak, dyrektar pa raźvićci hrupy kampanijaŭ «Viestier» Michaił Ramanienka paviedamiŭ pra plany zamacavacca na biełaruskim rynku. Ale ŭžo ŭ jakaści arandatara, u adroźnieńnie ad «HriNN». Sp. Michajłaŭ padkreśliŭ, što planujučy raźvićcio biznesu ŭ Biełarusi, varta ŭličvać asablivaści miascovaha palityčnaha ładu. Na jaho dumku, składanaści z uzhadnieńniem dakumentacyi mohuć raściahnuć budaŭnictva na hady. Nia varta taksama zabyvacca na mahčymaść dziaržkantrolu ŭ sfery cenaŭtvareńnia. U svaju čarhu dyrektarka homielskaj firmy «Kantakt» Iryna Kudraŭcava, što vałodaje supermarkietam «Arkada», ličyć pazytyŭnaj navinoj pabudovu handlovaha abjektu takich maštabaŭ: «Na siońnia ŭ horadzie najbujniejšaja handlovaja placoŭka nie pieravyšaje 1 tys. kv. m., tamu pabudovu handlovaha centru pamieram 16 tys. kv. m. varta tolki vitać». Spn. Kudraŭcava pry hetym pieraścierahaje kiraŭnictva kurskaj kampanii, što ad pačatku budaŭnictva na plečy «HriNN» haradzkija ŭłady ŭskładuć abaviazak pa papaŭnieńni miascovaha fondu raźvićcia i ŭładkavańnia prylahajučych terytoryjaŭ.
Karparacyja «HriNN» — šmatprofilnaje pradpryjemstva, jakoje zajmajecca budaŭničym, hadlovym, restarannym, hulniavym biznesam, aŭtapieravozkami. Hipermarkiety «Linija» adčynienyja ŭ siami haradach Rasiei. Razdrobavy zvarot u minułym skłaŭ $290 młn.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali14
Kamientary