Adnaho Cholcapfela na 400 miljonaŭ eŭra nie abmianiajuć :)

Siońnia vaš pakorlivy słuha mieŭ mahčymaść pahavaryć z Žan-Erykam Cholcapfelem. Tym samym, jaki, chutčej za ŭsio, ačolić pradstaŭnictva Eŭrakamisii ŭ Miensku.

Pavialičyć

Nahadaju: biełaruskija ułady dva hady ciahnuli ryzinu i tolki niadaŭna dali zhodu na adkryćcio hetaha ofisu. Ciapier abmiarkoŭvajucca techničnyja detali.

Tym časam stała papularnaj versyja, što naŭzamien Miensk chacieŭ, kab Eŭraźviaz skasavaŭ rašeńnie ab vyklučeńni Biełarusi z Abjadnanaj systemy preferencyjaŭ (ASP), jakoje maje nabyć moc 21 červienia. Ale Brusel užo vyrazna daŭ zrazumieć, što adnaho Cholcapfela na 400 miljonaŭ eŭra (hadavyja straty ad pazbaŭleńnia handlovych preferencyjaŭ) nie mianiaje :-) Sam ža dyplamat padkreślivaje: vyklučeńnie z ASP nia jość sankcyjaj, heta, tak by mović, pazbaŭleńnie premijalnych...

Siońnia ž my pačali havorku z taho, što ŭdakładnili, jak lepiej pisać jahonaje proźvišča, bo ŭ našych medyjach fihurujuć dva varyjanty. Pryjšli da vysnovy: Cholcapfel bližej da aryhinału, čym Holcapfel.

Ja prazandavaŭ hlebu: vyhladaje na toje, što u vas niamieckija karani? Tak, baćka pierajechaŭ u Francyju ź Niamieččyny, patłumačyŭ sp. Cholcapfel.

Potym pajšli pytańni bolej hruntoŭnyja.

Ci budzie ŭ pradstaŭnictvie niechta admysłova zajmacca pytańniami demakratyi dy pravoŭ čałavieka? Z adkazu sp. Cholcapfela vynikaje, što heta nia vyklučana. (Musić, uzhadniajuć štatny raskład i ŭ Bruseli, i ŭ Miensku? :-)

Ci nie tarmozić supracu zaściaroha biełaruskich uładaŭ, što pradstaŭnictva EK zrobicca niečym kštałtu KNH ABSE časoŭ Hansa-Heorha Vika? Sp. Cholcapfel dyplamatyčna zaznačyŭ, što ichniaja misija budzie imknucca datrymlivać balans u dačynieńniach, kantaktujučy i z uładaj, i z trecim sektaram, i z apazycyjaj.

Ci niama takoj niebiaśpieki, što biełaruski bok praz asobnyja sastupki (kštałtu vyzvaleńnia niekalkich palitviaźniaŭ) uciahnie Brusel u drobny palityčny handal, u jakim patonuć pryncypovyja pytańni demakratyzacyi Biełarusi?

Sp. Cholcapfel najpierš pakazaŭ brašuru z eŭraźviazaŭskaj symbolikaj dy tekstam znakamitych 12 umovaŭ Bruselu. I zapeŭniŭ, što vyraznaja meta sfarmulavanaj letaś stratehii EZ u dačynieńni da Biełarusi — damahčysia jaje demakratyzacyi. Papraviŭ mianie: lepiej kazać nie pra 12 umovaŭ, a pra 12 punktaŭ, prapanoŭ Eŭraźviazu.

Badaj, słušna. Heta ž nie ŭltymatum. Choča Biełaruś adhuknucca — kali łaska, nie — Eŭropa niejak pieražyvie.

Kudy bolej stračvaje Biełaruś na ŭzbočynie Eŭropy.

— Isnuje mierkavańnie, što biełaruski režym nia zdolny da refarmavańnia, — zaŭvažyŭ ja.

— Jak dyplamat nie mahu davać acenki na hety kont. Ale razam z tym my, dyplamaty, musim być prafesyjnymi aptymistami, — reziumavaŭ surazmoŭca.

Dla pracy ŭ Biełarusi sp. Cholcapfelu spatrebicca vialiki resurs aptymizmu.

Pavialičyć

• 0
• 0
• 0
• 0
• 0
• 0
• 0
• 0