Naviny

Naviny

Łatypaŭ klaniecca

Sajuz piśmieńnikaŭ naładziŭ u Domie litaratara sustreču ź vice-preḿjeram, ministram zamiežnych spravaŭ Urałam Łatypavym. Pavodle Łatypava, u jahonym ministerstvie niama nivodnaha čałavieka, jaki pahadziŭsia b z mahčymaj strataj suverenitetu Biełarusi, nikoli nie pahodzicca na heta j sam Łukašenka. Ministar zamiežnych spravaŭ źviarnuŭsia da piśmieńnikaŭ ź prośbaj paŭpłyvać na apazycyju, kab taja kinuła zaklikać mižnarodnyja arhanizacyi da ekanamičnych sankcyjaŭ suprać biełaruskaha režymu, bo ad izalacyi krainy cierpić nia ŭłada, a ŭvieś narod. Łatypaŭ paabiacaŭ dać zahad biełaruskim ambasadam prapahandavać ajčynnuju kulturu za miažoj, spryjać vydańniu pierakładaŭ našych piśmieńnikaŭ, padtrymlivać biełaruskuju dyjasparu. Ministar miarkuje da kanca hodu daskanała vyvučyć biełaruskuju movu — niezaležna ad taho, ci zachavaje svaju pasadu.

Z multymedyjnym trekam

Rok-hurt NRM vypuściŭ pieršy ŭ Biełarusi mini-kampakt-dysk z multymedyjnym trekam. Zapisany ŭ Polščy CD-synhł maje nazoŭ «Samotnik» i papiaredničaje vychadu adnajmiennaha zvyčajnaha albomu. Aproč niekalkich novych piesień, na mini-dysku zapisanyja fotazdymki hurtu i videaklip «Čystaja, śvietłaja».

Pavodle Vitkieviča

Ažno try viečary doŭžyŭsia ŭ Pałacy moładzi premjerny spektakal «Matka» mienskaha Plastyčnaha teatru pavodle pjesy polskaha dramaturha ź biełaruskaha Paleśsia Stanisłava Vitkieviča. Pastanoŭščyk «Matki», režyser Usievaład Ivaškievič, stvaryŭ teatralny ekvivalent lubych našym sučaśnikam televizijnych seryjałaŭ. Artysty na spektakli byli apranutyja ŭ fantastyčnyja stroi z kalekcyi festyvalu avanhardovaj mody «Mamant».

Suvenirnyja knihi

Vydaviectva «Biellitfond» raspačało vydańnie seryi knih biełaruskich klasykaŭ z paralelnym pierakładam u zamiežnyja movy. Tolki što vyjšaŭ zbornik 16 aŭtaraŭ (ad Jadźvihina Š. da Volhi Ipatavaj) «Biełaruskija apaviadańni» ź pierakładam u niamieckuju. Na praciahu miesiaca majuć vyjści taksama zborniki klasyčnych biełaruskich vieršaŭ z paralelnym pierakładam u baŭharskuju i rumynskuju movy.

ARCHE i «Cmoki» ŭ «Savie»

U viciebskim klubie «Sava», jaki mieścicca ŭ kinateatry «Biełaruś», prajšła dyskusija z nahody vyjścia pieršaha numaru analityčna-krytyčnaha ahladu «ARCHE-Skaryna». Brali ŭdzieł siabry redakcyi. Viciebsk uradžajny na aŭtaraŭ dla časopisnaj rubryki «Kronika», u jakoj drukujucca palitviaźni: adkryvałasia jana «Vaładarskaj baladaj» viciablanina rodam P.Sieviarynca, paśla ŭ joj ža drukavalisia U.Pleščanka i A.Mielnikaŭ, čałaviek aršanski, a ŭ pieradapošnim numary — S.Adamovič, jahony dziońnik ź siadzieńnia ŭ Viciebskim astrozie. Padyskutavaŭšy pra sumnaje, patancavali: razam z ARCHEŭcami ŭ Viciebsk pryjechaŭ rok-hurt «Cmoki».

Juraś Barysievič