Pazytyvy
Nitoŭnik
U žyćci časam zdarajucca nie zaŭsiody značnyja, ale zaŭsiody niepryjemnyja rečy: naprykład, kali ŭ poŭnaj ciemry nie traplaješ nahoj na prystupku. Albo kali nakrutka, jakaja, zdavałasia, jašče krychu i dobra pryciśnie toje, što maje prycisnuć, raptam pa-zdradnicku lohka paddajecca... I ruka ź nitoŭnikam biezdapamožna apuskajecca.
Apošniaje, darečy, nie zaŭsiody drobiaź. Ad sarvanaj narezki da złomu hałavy časam adzin krok.
Dyk voś, NVA z typova tutejšaj nazvaj «VIEŁKAP»1 , jakoje utvaryłasia na bazie Instytutu nadziejnaści mašynaŭ Nacyjanalnaj Akademii Navuk, vyrabiła nitoŭnik novaje hieneracyi. Taki, što na kanvejery zborki, prykładam, traktaraŭ nia zreža narezki nakrutak nikoli, bo «adčuvaje» aptymalny ŭzrovień zacisku.
Ideja novaha aŭtamatyčnaha nitoŭnika nia novaja, i analahi jość. Kaštuje cudoŭnaje «nažendzie» ŭ Eŭropie ad troch z pałovaj da vaśmi tysiačaŭ dalaraŭ. Rasiejskija i amerykanskija admysłoŭcy «ŭ spułku» zrabili analah koštam 1000 dalaraŭ. Naša prystasavańnie ŭdvaja tańniejšaje za rasiejska-amerykanski pradukt.
Tam, dzie ŭ rečach razumiejuć, užo karystajucca navinkaj: na Mienskaj i Baranavickaj čyhuncy, Asipovickim ahrehatnym dy Viciebskim zavodzie ramontu ruchavikoŭ. Try supernitoŭniki zadziejničanyja taksama na MTZ i jašče siem zamoŭlenyja zavodam.
Popyt stała pašyrajecca, i niekatoryja miarkujuć, što tym samym značna palepšycca jakaść biełaruskaj mechanazborki. Jano tak, ale varta zaznačyć, što perspektyvy novaha vyrabu šmat u čym zaležać taksama ad prahresu jahonaha elektronnaha kampanentu i sumiaščalnaści apošniaha z sučasnymi zboračnymi linijami suśvietnaha ŭzroŭniu.
Heta dobra razumiejuć u krajoch, dzie za technalahičnyja navinki zmahajucca, jak u nas za mandat ŭ Nacyjanalny schod: u Niamieččynie i Sinhapury. Firmy z hetych i biez taho prasunutych krainaŭ užo prapanavali svaje dylerskija dyj inšyja pasłuhi ŭ pradstaŭleńni pradukcyi VIEŁKAPu na suśvietnym rynku.
Pryjemnaja navina, tym nia mienš, vyklikaje peŭnyja niadobryja asacyjacyi, nakštałt štodzionnaha «zakručvańnia hajek» u našym dziaržaŭnym mechaniźmie, a taksama poŭnaha niaviedańnia krucilščykaŭ i zaciskalščykaŭ u im pra asablivaści supracivu takoha tajamničaha matarjału, jak kadry...
Ale heta, mabyć, bolš tyčycca psychalohii, čym mechaniki i da pazytyvaŭ nia maje anijakaha dačynieńnia.
Michał Zaleski
1 Kab chto jašče zadumaŭsia nia tolki nad nazvami rečaŭ niaznačnych i napaŭzabytych, ale j nad tym, što naahuł nia mieła imionaŭ i praz toje atrymlivaje imiony durackija (dastatkova zirnuć na šyldy našych ustanovaŭ i firmaŭ). Jak jano budzie, «Viełkap» pa-biełarusku?
Kamientary