Padziei psychalahičnaha značeńnia

Padziei psychalahičnaha značeńnia

Na pracesie nad kamunizmam z abvinavaŭčym zaklučeńniem vystupiŭ biełaruski prakuror

Na minułym tydni ŭ Vilni adbylisia dźvie značnyja padziei: sud nad złačynstvami kamunizmu i kanferencyja biełaruskich i litoŭskich palitykaŭ ab raźvićci parlamentaryzmu ŭ Biełarusi. Na kanferencyi vystupili staršynia Sojmu Litvy V.Łandsberhis, staršynia Viarchoŭnaha Savietu Biełarusi S.Šarecki, a taksama A.Labiedźka, V.Viačorka, Z.Paźniak, M.Pastuchoŭ, S.Šuškievič i pryznačany Viarchoŭnym Savietam hienprakuror Biełarusi R.Prakapovič. My paprasili prakamentaravać hetyja padziei sp.Šareckaha i Paźniaka.

Na pytańnie, što admietnaha było na kanferencyi, sp.Šarecki skazaŭ:

— Toje, što treba kryminalnuju ŭładu na Biełarusi, a dakładniej, režym, jaki ličyć siabie ŭładaj – adchilić. Heta było i ŭ maim vystupie, i ŭ vystupie Zianona Stanisłavaviča, i ŭ vystupie Hieneralnaha prakurora Prakapoviča.

— Što robić Viarchoŭny Saviet, kab paspryjać abjadnańniu apazycyi?

— A chiba apazycyja raźjadnanaja? Heta žurnalisty ličać, što apazycyja raźjadnanaja, niachaj jany i zmahajucca za abjadnańnie. Nasamreč apazycyja nie raźjadnanaja. Jość Kaardynacyjnaja Rada, jakaja abhruntoŭvaje ŭsie hałoŭnyja kroki apazycyi. A kali tam niechta pajšoŭ na vybary – dyk jon prosta nia byŭ u apazycyi, jon byŭ prysłany ŭ apazycyju, kab buntavać. Heta vy ličycie Mikołu Statkieviča adnym ź lideraŭ apazycyi, ja jaho takim nie ličyŭ nikoli. Siońnia takoje nadvorje dobraje – navošta pra jaho havaryć.

Zianon Paźniak, staršynia Kanservatyŭna-Chryścijanskaje Partyi BNF, adznačyŭ:

— Prahučała istotnaje: vybary, chutčej za ŭsio, pryznanyja nia buduć, i paśla hetaha Łukašenka pavinien budzie pakinuć svaju pasadu. Bo jon nichto, jon nielehitymny. I ŭłada pavinna być pieradadziena Viarchoŭnamu Savietu, jaki praviadzie zakonnyja vybary.

— Jaki ŭ takim vypadku budzie mechanizm pieradačy ŭłady?

— Hramadzki mižnarodny cisk. Sam fakt niepryznańnia vybaraŭ maje vialikaje psychalahičnaje značeńnie. I tamu pastanoŭka pytańnia ab tym, što Łukašenka pavinien pakinuć uładu paśla niepryznańnia vybaraŭ, — heta fakt i psychalahičnaha značeńnia, i palityčnaha. Heta vielmi istotna i realna. Jakraz heta było abhruntavana ŭ vystupach Hieneralnaha prakurora, sp.Šareckaha i maim.

— Jak, na vaš pohlad, idzie sud nad kamunizmam, inicyjavany ŭ Vilni?

— Ja liču, što heta vielmi surjoznaja padzieja. Trybunał praciahvaje dziejničać: na pačatku vieraśnia było pasiedžańnie, dzie Hieneralny prakuror Biełarusi sp.Prakapovič vystupiŭ z abvinavaŭčym zaklučeńniem. Ja jaho čytaŭ: heta vielmi hruntoŭny dakument. U im rasiejskamu kamunizmu pradjaŭlena abvinavačańnie pa ŭsich złačynstvach, ździejśnienych im u Biełarusi. Vystaŭleny rachunak za paŭtara miljona zabitych biełarusaŭ, abhruntavany archiŭnymi źviestkami. Heta asnova dla pracesu, jaki, ja ŭ hetym nie sumniavajusia, pryviadzie da druhoha Niurnberhu.

Hutaryŭ Andruś Biełavoki