Na pačatku 90-ch «Hościcu» časta možna było bačyć i na kancertnych scenach, i na teleekranie. Było źniata bolš za 20 filmaŭ roznaj praciahłaści — ad 2 da 30 chvilinaŭ. A paśla — jak adrezała. Za apošnija hadoŭ 5—6, adznačaje kiraŭnička «Hościcy» Ł.Simakovič, nivodzin režyser nie zdymaŭ numaroŭ, pastaŭlenych kalektyvam: «Nam prosta nie dajuć zdymačnych dzion i mahčymaści. U nas bahata hatovaha materyjału, tolki staŭ kamery i filmuj! Ja kolki razoŭ zaprašała režyseraŭ — nie prychodziać i nie hladziać. Ich nie cikavić heta! A načalstva mnie kaža: nivodnaj raboty nia źniata, a navošta vy nam tady patrebnyja?»
| FOTA ANDREJA LANKIEVIČA |
Dalejšy los kalektyvu maje dva varyjanty. Pieršy — «Hościca» zdoleje stvaryć svoj teatar, kštałtu «Źniču» Haliny Dziahilevaj. Tolki na heta treba fundatar, zhodny ŭkładać hrošy ŭ «nietypovaje» mastactva. Inšy varyjant kiraŭnictva BDTRK ahučvaje ŭžo hadoŭ 5—6: muzyčnyja kalektyvy pry teleradyjokampanii nia treba. «Z čysta ekanamičnaha punktu hledžańnia možna było b pahadzicca. Jość ža Minkult, jaki musić zajmacca hetymi kalektyvami. Ale, na majo subjektyŭnaje mierkavańnie, takim patencyjałam nie raskidajucca», — upeŭniena kaža kiraŭnička «Hościcy». I cicha dadaje: «Dziaržava ŭvieś čas havoryć pra svaju biednaść. Nibyta heta padstava dla honaru».
Źniknuć falklorny teatar moža vielmi prosta. Jak i ŭsie supracoŭniki BDTRK, Ł.Simakovič pracuje na kantraktnaj asnovie. Uletku ŭ jaje skončycca termin kantraktu, a kiraŭnictva kampanii maje prava nie praciahvać jaho.
Adzinym paratunkam dla siabie i dla kalektyvu spadarynia Łarysa bačyć budučy kancert. «My jość, nam jość što pakazać. Ja spadziajusia, što paśla hetaha kancertu źjavicca patreba ładzić takija vystupy prynamsi raz na miesiac. Bo toje, što prapanuje «Hościca», na siońnia ni da čoha nie padobna, takoha nia moža prapanavać nichto», — kaža jana.
Arkadź Šanski
Kamientary