Dzie varta być

28 LUTAHA

Da 10-hodździa pasolstva ŭ Miensku

Japonskaje kino dla biełarusaŭ adkryli tradycyjnyja štohadovyja festy japonskaha kinamastactva. Nietaropkaściu apoviedu japonskija filmy padobnyja da biełaruskich. Sioletni kinafest maje nazoŭ «Chryzantemy apošnich dzion». Jon prymierkavany da 10-hodździa adkryćcia pasolstva Japonii ŭ Biełarusi.

Chto nabudzie hazetu ŭ čaćvier, paśpieje ŭ mienskim kinateatry «Pieramoha» pahladzieć čaćviertuju stužku Takiešy Kitana «Sanacina». Heta hanhsterskaja saha. Bos bandytaŭ nakiroŭvaje svajho čałavieka na Akinavu. Toj traplaje ŭ samy vir hanhsterskich «razborak». U nietaropkaj maniery «naziralnika zboku», z dolaju aryhinalnaha humaru Kitana viadzie havorku na temu śmierci. U 1993 h. film demanstravaŭsia ŭ Kanach u raździele palemičnych kinastužak.

U piatnicu — «Kraina miortvych» Siuńjici Nahasaki, psychalahičny tryler u najlepšych tradycyjach žanru. Chinaka viartajecca ŭ viosku, dzie prajšło jaje malenstva. A tam — trahiedyja: pamierła siabroŭka. Chinaka znajomicca z byłym kachankam siabroŭki, miž imi pastupova naradžajecca pačućcio. Usio b dobra, ale niabožčyca imkniecca vyrvacca z krainy miortvych, kab pabačyć kachanaha.

Abodva filmy pačynajucca a 19-j. A ŭ subotu a 13-j — dziciačy multfilm «Astra-boj» režysera Asamy Tedzuki — historyja pryhodaŭ chłopčyka-robata z nadzvyčajnymi zdolnaściami.

Paśla kinafest pierajedzie ŭ Mahiloŭ. 5 sakavika tam pakažuć kryminalnuju trahikamedyju Sinobu Jahuci «Adrenalinavaja honka». Mašyna prostaha klerka ŭrezałasia ŭ «jahuar» Kuraivy — adnaho z bosaŭ mafii. Jakudza ciahnie niebaraku ŭ bar — abmierkavać mahčymaści «kampensacyi strataŭ». Bar uzryvajecca, a klerk, ačomaŭšysia siarod ruinaŭ, znachodzić 200 miljonaŭ bandyckich jenaŭ. Ale vyžyŭ i Kuraiva, jaki pačynaje palavańnie na biednaha klerka. 6 sakavika možna budzie pahladzieć liryčnuju meladramu režysera Naoty Takenaki «Nikčemny čałaviek» pra žyćcio japonskich aŭtsajderaŭ, 7-ha — «Sanacinu», 8-ha — «Krainu miortvych», a skončycca fest 9 sakavika «Astra-bojem».

Uładzimier Pučynski

Kancert «Klasyk-avanhardu»

6 sakavika ŭ kaściole Śv.Rocha (pr.Skaryny, 44a) adbudziecca vystup ansamblu salistaŭ «Klasyk-avanhard» pad kiraŭnictvam Uładzimiera Bajdava. U prahramie: Jan Dzismas Zialenka — Kancert Sol mažor; Luidžy Bakieryni — Sekstet Mi bemol mažor (pieršaje vykanańnie); Mucyjo Klemenci — Nanet Mi bemol mažor (pieršaje vykanańnie); Mask Bruch — Septet Mi bemol mažor (pieršaje vykanańnie); Ihar Stravinski — Septet dla klarneta, fahota, vałtorny, skrypki, alta, vijalančeli i fartepijana (pieršaje vykanańnie). Pačatak u 19.00. Kvitki pradajucca.

• 0
• 0
• 0
• 0
• 0
• 0
• 0
• 0