Što zaraz budzie i što rabić

Adkazvajuć palityki i dziejačy kultury

Zianon Paźniak, staršynia Kanservatyŭna-chryścijanskaj partyi BNF: Treba doŭhaja aśvietnaja praca

Što ciapier? Pieršaje. Treba chutka sabrać usie fakty parušeńniaŭ zakonu i pradstavić u mižnarodnyja arhanizacyi, jakija nazirali za hałasavańniem. Važna, kab mižnarodnaja supolnaść nie pryznała referendumu. Druhoje. Nie dapuścić mižnarodnaj izalacyi Biełarusi. Treba prapanavać plan izalacyi režymu, ale nia našaj krainy. I treciaje. Biełaruskamu hramadztvu ciapier treba zrazumieć, što peryjad usialakaj vybarčaj baraćby z režymam skončyŭsia kančatkova. Prezydenckija vybary 2006 h. buduć kopijaj učarašniaha referendumu.

Ciapier nieabchodna ŭsieahulnaja baraćba z režymam na inšym uzroŭni, raźličanaja na praciahły čas. Pierš za ŭsio, nieabchodna nacyjanalna-kulturnaja i nacyjanalna-palityčnaja aśvieta hramadztva. I jość ludzi, jakija mohuć heta rabić.

Andrej Kazakievič, palitolah: Budzie delehitymizacyja režymu

— Režym dasiahnuŭ stupieni kansalidavanaha aŭtarytaryzmu, i surjoznych źmienaŭ u krainie čakać nia varta. Adno što ŭzrovień falsyfikacyj na hetych vybarach byŭ vidavočny dla samich pradstaŭnikoŭ ułady, tamu budzie adbyvacca delehitymizacyja režymu. Vyniki parlamenckich vybaraŭ — nia duža drennyja: uładam nie ŭdałosia pravieści hetuju kampaniju hetak ža čysta, jak u 2000 h. 108 deputataŭ, vybranych u pieršym tury, dy jašče kab za ich prahałasavali pa 70—80% — heta nierealnyja ličby!

Ciapier nia toj čas, kab pravodzić vuličnyja akcyi: nia taja enerhietyka ŭ ludziej, niama takoha zapału, jak u 96—97-m hadach. Najbolš racyjanalna — praciahvać udzieł u palityčnych kampanijach (vybarčych i inš.), vieści adkrytuju palityčnuju dziejnaść. A voś palityku i kulturnuju dziejnaść treba razvodzić. Palitykam nia treba zajmacca aśvietnickaj dziejnaściu, dla hetaha jość hramadzkija arhanizacyi i kulturnyja inicyjatyvy.

Alaksandar Vajtovič, akademik, kiraŭnik hramadzianskaj inicyjatyvy «Za spraviadlivyja vybary»: Budzie žorstka

— U cełym u krainie ničoha nie pamianiajecca — dyktatura jość dyktatura! Chiba što, karystajučysia abjaŭlenymi vynikami (choć jany i niepraŭdzivyja), dyktatura budzie bolš žorstka abychodzicca z apanentami. Najbolš aburalny taki prykład — vypadak z Šaramietam.

Ciapier nastaŭ momant, kali apazycyjnyja siły pavinny sabracca razam i vypracavać stratehiju i taktyku sumiesnaha dziejańnia. Vybary ŭ takim vyhladzie nie niasuć nijakich stratehičnych źmienaŭ: prezydent zahadzia daje ŭstanoŭku, jak pavinna prajści kampanija. Ale vyrašać pra ŭdzieł ci niaŭdzieł apazycyi ŭ takich kampanijach varta nie za hod-paŭtara, a bližej da samich vybaraŭ.

Uładzimier Kołas, staršynia Rady intelihiencyi: Ja dakažu, što pieramoh

— Vybary pakazali, što praśviatleńnie ŭžo pryjšło i narod usio razumieje. U nas u krainie ŭsio pavinna być dobra, kali my zrobim svaju spravu, za jakuju ŭzialisia. Kali nie — značyć, nami i nadalej buduć kiravać ludzi, u jakich i siemki na bazary nielha kuplać.

Asabista ja maju namier sabrać podpisy tych ludziej, jakija za mianie hałasavali, i dakazać, što ja pieramoh. Pa-druhoje, sam Łukašenka ŭžo kazaŭ: vyjdzie 100 tysiač na vulicu — i jaho niama. Kali tyja, chto za heta braŭsia, niazdolnyja dobra zrabić spravu, chaj sastupiać inšym.

Poŭnaściu hety artykuł možna pračytać u papiarovaj i pdf-versii "Našaj Nivy"

Apytvaŭ Aleś Piatkievič, słovy Zianona Paźniaka cytujucca pavodle radyjo «Svaboda»

• 0
• 0
• 0
• 0
• 0
• 0
• 0
• 0