Чацьвёра актывістаў віцебскай гарадзкой арганізацыі КХП‑БНФ атрымалі лісты з пагрозамі ад незарэгістраванай арганізацыі «Русское национальное единство».
Лісты прыйшлі ў мінулую пятніцу па пошце на хатнія адрасы вядомага ў горадзе апазіцыянера Барыса Хамайды, а таксама ягоных калег Яна Дзяржаўцава, Сяргея Каваленкі і Яна Таўпыгі. Цікава, што да кожнага з адрасатаў невядомыя звяртаюцца як да «Мірона».
«Там так і напісана: «Мирон! Если ты еще раз вывесишь в нашем городе свою бело‑красно‑белую тряпку, мы тебя обязательно накажем», —цытуе Б.Хамайда.
Па ягоных словах, лісты напісаны не звычайным почаркам, а друкаванымі літарамі. Пры гэтым на паштовых канвертах — малюнак, які нагадвае, што сёлета адзначаецца 125‑годдзе з дня нараджэння беларускага паэта Янкі Купалы. У гэтым Б.Хамайда таксама бачыць здзек над нацыянальнымі святынямі.
«Гэтыя пагрозы, натуральна ж, не спыняць Мірона, бо гэта легендарная і няўлоўная фігура. Гэта народны вобраз героя, які змагаецца за незалежнасць і свабоду сваёй Бацькаўшчыны. Таму бел‑чырвона‑белыя сцягі як з’яўляліся, так і будуць з’яўляцца, і не толькі ў Віцебску, але і ў іншых гарадах Беларусі», — лічыць Б.Хамайда.
Па ягоных словах, звяртацца ў міліцыю і пракуратуру збіраецца толькі адзін з тых, хто атрымаў ліст, — Ян Дзяржаўцаў. Астатнія лічаць гэта дарэмнай стратай часу. Нагадаем, што лісты з пагрозамі ад РНЕ у розны час летась атрымалі рэдакцыя незалежнай газеты «Витебский курьер», старшыня гарадской арганізацыі АГП Алена Залеская і загадчыца літаратурнай часткай Нацыянальнага акадэмічнага драматычнага тэатра імя Я.Коласа Вікторыя Дашкевіч. Ва ўсіх выпадках прадстаўнікі закона на іхнія заявы з нагоды атрымання пагроз прыслалі звычайныя адпіскі і не знайшлі тых, хто адпраўляў лісты.
Што тычыцца бел‑чырвона‑белых сцягаў, то ў Віцебску гэта ўжо традыцыя. Перыядычна, раз ці два разы на месяц, іх вывешваюць у розных месцах горада, звычайна цяжкадасягальных. Як правіла, гэта здараецца напярэдадні нацыянальных святаў і адметных гістарычных падзей. Пры гэтым невядомы герой заўсёды пакідае занатоўку з подпісам «Мірон».
Цяпер чытаюць
Айцішнік і былы палітвязень Віктар Куўшынаў прадае за 850 тысяч еўра дом у Партугаліі, які пабудаваў паўтара года таму ФОТЫ10
Каментары