У Гомелі ў перыяд здачы экзаменаў у ВНУ ў абласную спецыялізаваную клінічную бальніцу штодзённа звяртаюцца адзін-два студэнты са скаргай на мікранавушнікі, што заселі ў вушах.
Як паведамілі БелаПАН у медыцынскай установе, студэнты змяшчаюць мікранавушнікі занадта глыбока ў вуха і потым не могуць іх дастаць з дапамогай магніта, які прадаецца ў камплекце з навушнікамі. Паводле слоў медработнікаў, некаторы студэнты ўстанаўліваюць мікранавушнікі побач з барабаннай перапонкай.
5 чэрвеня ў аддзяленне отарыналарынгалогіі бальніцы звярнулася студэнтка з запаленнем барабаннай перапонкі. Пакуль дактарам не ўдалося дастаць мікранавушнік з вуха дзяўчыны.
У практыцы гомельскіх лор-дактароў былі выпадкі, калі мікранавушнікі змяшчалі за перашыек храстка — гэта самае вузкае месца ў вушах, і тады выдаліць прыстасаванне вельмі цяжка.
Але пакуль да хірургічных аперацый дактары не звярталіся — мікранавушнікі дастаюць шчыпцамі і кручком.
Яны зазначаюць, што ўсё больш маладых людзей карыстаюцца мікранавушнікамі, якія становяцца ўсё драбнейшымі, і іх усё цяжэй дастаць з вуха нават медыцынскім работнікам. Часты дыягназ у аматараў халявы на экзаменах — вонкавы атыт.
Лор-урачы не раяць выкарыстоўваць магнітныя мікранавушнікі з-за магчымых траўм аж да страты слыху.
Каментары