Міністэрства абароны параіла свайму супрацоўніку Кажэўнікаву «звярнуць увагу на навуковыя працы пра станаўленне беларускай мовы»
Уладзімір Кажэўнікаў — гэта супрацоўнік міністэрства абароны Беларусі, адзін з рэдактароў агенцтва «Ваяр», які нядаўна праславіўся сваімі развагамі пра беларускі герб «Пагоня» і публікацыямі ў сацсетках.
У сваім фэйсбуку і твітары Кажэўнікаў рабіў рэпосты з антыбеларускімі і антыўкраінскімі выказваннямі, упарта называў Беларусь «Белоруссіей» і сцвярджаў, што нават «Бацька і ягоныя прапагандысты не змогуць змяніць правілаў расійскай мовы».
Таксама Кажэўнікаў даводзіў, што Сімферопаль, Масква і Мінск знаходзяцца ў адной краіне, а беларускай мовы не існуе — ёсць «заходнеруская».
На падставе гэтых допісаў прынамсі адзін чалавек напісаў у Міністэрства абароны зварот з просьбаю патлумачыць выказванні супрацоўніка Кажэўнікава.
І вось сёння ў фэйсбуку апублікаваны адказ з міністэрства. (Свой твітар-акаўнт Кажэўнікаў, дарэчы, ужо выдаліў).
У ім напісана, што з Кажэўнікавым «праведзеная размова пра неабходнасць ужывання агульнапрынятай назвы краіны — Рэспубліка Беларусь».
Апроч таго, Кажэўнікаву нібыта параілі «звярнуць увагу на навуковыя працы беларускіх вучоных, прысвечаныя пытанням паходжання і станаўлення беларускай мовы».
Але разам з тым у Міністэрстве абароны адзначылі, што Кажэўнікаў, як грамадзянін, мае права выказваць свае погляды ў сацыяльных сетках.
Экстрэмізму ў публікацыях Кажэўнікава не знайшлі.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень11
Каментары