Сірыя паскардзілася ў ААН на месенджар Telegram, а Telegram — на Расію
Сірыя заклікала Раду бяспекі ААН прыняць меры для барацьбы з незаконным гандлем зброяй праз сэрвіс абмену паведамленнямі Telegram. У якасці доказу Дамаск прывёў публікацыю ў часопісе Foreign Policy, у якой распавядаецца пра збыт зброі, у тым ліку вырабленай у ЗША, праз папулярны месенджар.
Выданне Foreign Policy адзначала, што не можа дакладна пацвердзіць факт продажу зброі, аднак падкрэслівала, што аб яе незаконным абароце сведчаць «маштаб рынку, тысячы карыстальнікаў і пасты з унікальнымі ўзорамі ўзбраенняў».
Часопіс, у прыватнасці, апублікаваў дзясяткі скрыншотаў з фотаздымкамі перапіскі і зброі, уключаючы вырабленыя ў ЗША агнястрэльную зброю і часткі супрацьтанкавых ракетных комплексаў.
Telegram супраць Расіі
Незалежна ад гэтага выпадку ў ААН звярнуліся і юрысты, якія прадстаўляюць сам месенджар Telegram.
Праваабарончая група «Агора» звярнулася да прадстаўніка ААН па пытаннях права на свабоду слова Дэвіда Кайе з просьбай не дапусціць блакавання месенджара ў Расіі.
Адвакаты падкрэсліваюць, што праз адмову кампаніі паведаміць ФСБ ключы шыфравання карыстальніцкіх перапісак Telegram могуць заблакаваць у Расіі. Прадстаўнікі «Агоры» тлумачаць, што «ні ў каго, уключаючы распрацоўшчыка праграмнага забеспячэння і адміністратара сэрвісу, няма тэхнічнай магчымасці атрымаць або вырабіць дублікаты гэтых ключоў».
Прадстаўнікі Telegram лічаць, што дзеянні расійскіх уладаў скіраваныя на «знішчэнне ананімнасці ў інтэрнэце».
Праваабаронцы нагадваюць Кайе, што гэта супярэчыць яго ўласнай пазіцыі і рэзалюцыі Генеральнай асамблеі ААН «Права на недатыкальнасць прыватнага жыцця ў лічбавую эпоху».
Цяпер чытаюць
«Ні тады, ні сёння я не лічу, што зрабіў штосьці кепскае». Дзядок шчыра расказаў пра былыя адносіны з 16‑гадовай дзяўчынай45
Каментары