25 лютага ў эфіры незалежнага тэлеканала «Белсат» выйдзе першы выпуск перадачы «Я не буду гэта есці». Канцэпцыя перадачы ў тым, што госць расказвае пра страву, якую не мог есці з дзяцінства. А шэф-кухары, якія змагаюцца паміж сабой, павінны прыгатаваць гэтую страву так, каб герой не проста ўсё з’еў, але і папрасіў яшчэ зверху.
Вядома, што ў першай перадачы паміж сабой пазмагаюцца шэф-кухар паба «Malt & Hops» Вольга Прыгарава і кіраўнік гільдыі кухараў Аляксандр Чыкілеўскі.
Звяртае ўвагу, што новае шоу будзе выходзіць па-расейску. Чаму? Пра гэта мы спыталіся ў прадстаўніка тэлеканала «Белсат» у Беларусі Аляксея Мінчонка.
«Мы ўвесь час спрабуем знайсці новыя крыніцы фінансавання, і праграма «Я не буду это есть» — вынік плённага пошуку. Але ўмовай грантадаўцы была магчымасць адаптавання праграмы да іншых рынкаў, галоўным чынам гаворка вядзецца пра Літву, Латвію і Украіну, дзе разумеюць расейскую мову. Таму ў праграме расейскамоўныя вядучыя. Але кожнае выданне пасля прэм’еры атрымае беларускую версію (голас дыктара, надпісы), якое таксама будзе паказана ў нашым эфіры.
Гасцямі праграмы будуць вядомыя ў Беларусі, але патэнцыйна цікавыя замежнікам людзі. Ужо гатовыя тры пілотныя выпускі, пабачыць іх у эфіры «Белсату» можна ў нядзелі 25 лютага, 4 і 11 сакавіка», — кажа Аляксей Мінчонак.
Раней на «Белсаце» па-расейску выходзіла інфармацыйная перадача «Вот так».
Каментары