Намеснікам дэкана журфака БДУ стане 30-гадовы работнік ІАЦ, спецыяліст па мемах
Ад 17 верасня намеснікам дэкана факультэта журналістыкі БДУ стане 30-гадовы Уладзімір Сцяпанаў.
У 2010 годзе ён скончыў журфак, потым вучыўся ў магістратуры і аспірантуры, выкладаў у alma mater.
Адначасова з работай на журфаку на яго звярнулі ўвагу ў Інфармацыйна-аналітычным цэнтры пры Адміністрацыі прэзідэнта. Ён быў дарадцам-кансультантам аднаго з упраўленняў.
Сцяпанаў стаў кандыдатам філалагічных навук, абараніўшы дысертацыю па тэме «Сацыяльныя медыя ў працэсах трансфармацыі журналісцкай дзейнасці ў Беларусі». У сферы яго даследаванняў — праца беларускіх СМІ ў сацыяльных сетках і, у прыватнасці, выкарыстанне мемаў. Прычым аналізуюцца медыя ўсяго спектру, уключна з «Хартыяй'97» і тэлеграм-каналамі.
Калі ж ад пасады дырэктара Інстытута журналістыкі БДУ вызвалілі Сяргея Дубовіка, адным з імаверных пераемнікаў разглядаўся і Сцяпанаў, але яму ў дакор ставілася тое, што ён занадта малады.
Таму дэканам стала Вольга Самусевіч, а Сцяпанаў стане яе намеснікам.
Яго характарызуюць як прагрэсіўнага чалавека, які не трымаецца за састарэлую савецкую метадалогію і ў сваіх навуковых работах і практычных занятках адлюстроўвае і аналізуе цяперашнюю рэчаіснасць, а не рэаліі мінулага стагоддзя.
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?2
Каментары