Зялёныя аркушы з пячаткамі райпа прызначаны для разліку ў крамах сваёй гандлёвай сеткі, паведамляе «Медыя-Палессе».
Такія «сертыфікаты» выдаюць работнікам Лунінецкага райпа.
Пра падобнае «ноу-хау» паведамілі чытачы і даслалі фатаграфію «сертыфікатаў».
Чытачы кажуць, што суму пакупак аднімуць з заробку.
Выглядае «сертыфікат» як звычайны аркуш А4 зялёнага колеру, разрэзаны на некалькі частак. На ім пазначана назва арганізацыі — Лунінецкае райпа, нумар дакумента (яго на фота прыкрылі ў мэтах прыватнасці) і сума.
На так званым «сертыфікаце» напісана: «Сертыфікат прад'яўляецца як сродак аплаты работнікам сістэмы ў прадпрыемствах рознічнага гандлю Лунінецкага райпа». На аркушы стаіць пячатка спажывецкага таварыства і тэрмін дзеяння.
Абураныя чытачы распавялі, што атрымалі такія «сертыфікаты» нядаўна, і атаварыць іх трэба па 30 верасня ўключна. Гэта значыць, купіць у крамах райпа на працягу практычна дзесяці дзён тавараў на 50, 70 або 100 рублёў, у залежнасці ад сумы атрыманых сертыфікатаў.
Калі ва ўладальніка такога «сертыфіката», напрыклад, на 10 рублёў, а сума пакупкі меншая, рэшту ў краме ніхто не верне.
На думку чытачоў, такія захады райпа робіць, каб утрымаць пакупніка пры большай канкурэнцыі — неўзабаве ў горадзе запрацуе буйны магазін іншай гандлёвай сеткі.
З просьбай пракаментаваць падобнае рашэнне Медыя-Палессе накіравала ў Лунінецкае райпа пісьмовы запыт, па тэлефоне аператыўна растлумачыць сітуацыю ў адміністрацыі прадпрыемства не пажадалі.
Каментары