Прэзідэнт Украіны Віктар Юшчанка выказаў шкадаванне, што Аляксандр Лукашэнка не ўдзельнічае ва ўстаноўчым саміце Усходняга партнёрства ў Празе.
Перад пачаткам саміта ўкраінскі лідэр заявіў журналістам, што «ў любым выпадку беларускі выбар — гэта еўраінтэграцыя і ўключэнне ў еўрапейскія працэсы». «Месца і роля Беларусі ва Усходнім партнёрстве вельмі важныя і патрэбныя», — упэўнены ён.
7 траўня ў Празе Юшчанка правёў сустрэчу з еўракамісарам па знешняй палітыцы Бенітай Ферэра‑Вальднер, з якой, у прыватнасці, абмеркаваў развіццё беларуска‑еўрапейскіх адносін. Ён выказаў надзею, што гэтае двухбаковае супрацоўніцтва будзе актывізавана.
Нагадаем, 6 траўня прэзідэнты Украіны і Беларусі сустракаліся ў Гомелі, дзе Лукашэнка выказаў падзяку ўкраінскаму калегу за падтрымку ўдзелу Беларусі ў праграме «Усходняе партнёрства».
Саміт праходзіць у закрытым рэжыме. Журналісты мелі магчымасць праслухаць прывітальныя рэплікі прэм’ера Чэхіі Мірэка Тапаланека (краіна старшынствуе ў ЕС) і старшыні Еўракамісіі Жазэ Мануэля Барозу.
Пасля завяршэння саміта адбудзецца прэс‑канферэнцыя чэшскага старшынства. З журналістамі таксама сустрэнецца Віктар Юшчанка. Беларуская дэлегацыя сустракацца з прадстаўнікамі СМІ не плануе.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны44
Каментары