Адміністрацыя інтэрнэт-аўкцыёна Allegro.by паабяцала змяніць рэгламент працы на карысць беларускамоўных карыстальнікаў.
Адміністрацыя інтэрнэт-аўкцыёна Allegro.by паабяцала змяніць рэгламент працы на карысць беларускамоўных карыстальнікаў.
У рэдакцыю напісаў карыстальнік інтэрнэт-аўкцыёна Allegro.by Павел Донаў. Ён піша, што яго лоты былі выдаленыя з гэтага парталу. Прычына — апісанне выстаўленай ім на продаж кнігі «Выбраныя працы акадэміка С.М. Некрашэвіча» было на беларускай мове.
Ён атрымаў ліст ад адміністратара Аліны Калеснікавай з настойлівымі патрабаваннямі ўважліва азнаёміцца з правіламі Allegro, іначай неаднаразовае выстаўленне такіх лотаў прывядзе да блакавання рахунка карыстальніка. Паводле яе слоў, апісанне лотаў, якія выстаўляюцца на Allegro.by, павінна быць выключна на рускай мове.
Азнаёміўшыся з рэгламентам партала, мы не знайшлі такога правіла, таму звярнуліся па тлумачэнні да самой Аліны Калеснікавай. Адказ не прымусіў сябе чакаць. Але ён меў кардынальна іншы характар:
«Прадстаўленая Вамі сітуацыя, на жаль, мела месца. Наш сэрвіс нядаўна пачаў сваю дзейнасць у Беларусі і ёсць яшчэ шмат недапрацовак. Мы пастаянна працуем над паляпшэннем сэрвісу і выпраўленнем хібаў. Дзякуючы падтрымцы і дапамозе нашых карыстальнікаў, якія паведамляюць нам пра памылкі на сайце, мы шчыльна працуем над рашэннем праблемаў.
Рэгламент Allegro.by быў запазычаны з нашай рускамоўнай платформы і ў сувязі з недаглядам з нашага боку і ў сувязі з тым, што раней не было такога кшталту скаргаў ад карыстальнікаў — не быў да гэтай пары зменены. Зразумела, рэгламент будзе выпраўлены. Згодна з новай версіяй рэгламенту можна будзе выстаўляць аўкцыёны на беларускай мове.
Карыстальніку, аўкцыён якога быў выдалены, мы абавязкова прынясем свае выбачэнні. І ўжо сёння ён зможа паўторна выставіць аўкцыён з апісаннем на беларускай мове».
Аказваецца, слова не толькі «лечыць і нявечыць», але таксама можа змяніць і рэгламент сайта.
Цяпер чытаюць
Прапагандысты запэўніваюць, што 196 палітвязняў ужо на свабодзе9
Каментары