The Observer заходнім лідарам: Трэба дзейнічаць рашуча, бо альтэрнатыва — бясконцая разня
Брытанскае выданне The Observer у рэдакцыйнай калонцы заклікала НАТА нарэшце распачаць рашучыя крокі для спынення вайны ва Украіне. Ва ўмовах жорсткасці Уладзіміра Пуціна НАТА мусіць разгледзець магчымасць прыняцця нашмат больш жорсткіх варыянтаў дзеяння.
Пасля канстатацыі фактаў шматлікіх ваенных злачынстваў расійскіх войскаў і недастатковага адказу на гэта з боку заходніх краін і блока НАТА выданне сцвярджае:
«Такога варварства трываць нельга. Далейшыя ганебныя безвыніковыя крыкі Захаду недапушчальныя. Чым хутчэй Байдэн і астатнія перастануць заломваць рукі і пачнуць прымаць рашэнні, тым лепш. Хоць гэта і правільны ўчынак, але ўчарашняя дэманстрацыя салідарнасці Борысам Джонсанам у Кіеве не зменіць разлікаў у Маскве.
Пуцін кіруе з дапамогай страху. Дык напалохайце яго ў адказ. Ён не хоча бітвы з Захадам, не кажучы ўжо пра Трэцюю сусветную вайну — апошняе апраўданне НАТА для адмовы ад супрацьстаяння яму. Ён ведае, што прайграе. Гэта яго палохае.
Такім чынам, вось некалькі цяжкіх рашэнняў, якія заходнія лідары павінны тэрмінова разгледзець.
Па-першае, прамое ўмяшанне з мэтай стварэння бяспечнай зоны ў Заходняй Украіне, дзе маглі б збірацца перамешчаныя асобы замест уцёкаў за мяжу. Загадзя паведаміце Маскве пра месцазнаходжанне гэтай зоны і яе межы. Выразна дайце зразумець, што яе будуць абараняць паветраныя сілы НАТА і наземныя войскі, запрошаныя Кіевам.
Па-другое, вазьміце пад абарону неакупаваную Адэсу. Накіруйце ваенна-марскія сілы ў міжнародныя воды ў Чорным моры і папярэдзьце Расію аб неабходнасці спыніць прыбярэжныя абстрэлы, інакш будуць сур'ёзныя, нявызначаныя наступствы.
Па-трэцяе, скажыце Пуціну, што калі яго артылерыйскія і ракетныя падраздзяленні зноў абстраляюць мірных жыхароў, як у Краматорску, яны будуць лічыцца легітымнымі ваеннымі мэтамі НАТА.
Па-чацвёртае, перадайце Кіеву знішчальнікі і танкі.
Па-пятае, заблакуйце ўвесь экспарт расійскага выкапнёвага паліва.
Гэта — радыкальныя рашэнні. Рызыкі відавочныя. Але адзіная альтэрнатыва — бясконцая разня. Калі Захад сур'ёзна настроены спыніць вайну, гэтыя і падобныя рашучыя дзеянні могуць быць адзіным магчымым выхадам».
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень11
Каментары