Сакрэт дэрматолагаў: мыла не такое карыснае, як падаецца

Кожны дзень мы сутыкаемся з брудам, бактэрыямі і потам, а душ з мылам здаецца простым спосабам ачысціцца. Аднак, як піша Time, дэрматолагі не з’яўляюцца прыхільнікамі мыла.

Чым небяспечна мыла?

Мыла можа негатыўна ўздзейнічаць на скуру па некалькіх прычынах. Як адзначаюць эксперты, яно ствараецца з тлушчаў або алеяў, змяшаных з гідраксідам натрыю (цвёрдае мыла) або гідраксідам калію (вадкае мыла). Гэтыя рэчывы эфектыўна выдаляюць бруд, але занадта агрэсіўныя, бо руйнуюць ліпіды, якія ўтрымліваюць вільгаць у скуры.

Мыла парушае ахоўны бар'ер скуры. Даследаванні паказалі, што чым часцей чалавек мыецца з мылам, тым больш пашкоджваецца яго скура. Гэта прыводзіць да яе сухасці, большай адчувальнасці і павышае рызыку інфекцый.

Мыла змяняе кіслотна-шчолачны баланс скуры. Скура па прыродзе мае кіслейшы pH, чым мыла. Калі парушаецца баланс, ахоўныя функцыі скуры слабеюць. Асабліва шкоднае дрэнна змытае мыла — рэшткі працягваюць негатыўна ўздзейнічаць на pH.

Па словах экспертаў, мыла забівае не толькі шкодныя, але і карысныя бактэрыі. Хоць ідэя «чыстай» скуры гучыць прывабна, многія бактэрыі жыццёва важныя для яе здароўя.

Мыла змяшчае араматызатары і непатрэбныя хімікаты. Вытворцы дадаюць у яго парфумерныя аддушкі, якія ствараюць адчуванне свежасці, але насамрэч могуць выклікаць раздражненне і алергію.

Чым замяніць мыла?

Дэрматолагі рэкамендуюць выкарыстоўваць сродкі для ачышчэння скуры (клінсеры) замест мыла. Яны мякчэйшыя і не парушаюць ахоўны бар'ер скуры, у адрозненне ад агрэсіўнага мыла.

Нямецкія вучоныя ў 2021 годзе высветлілі, што нават пры частым выкарыстанні клінсераў яны не наносяць шкоды ахоўнаму бар'еру скуры.

Асабліва важна замяніць мыла на больш мяккія сродкі для ачышчэння скуры тым, у каго яна сухая ці адчувальная. Да гэтай катэгорыі адносяцца пажылыя людзі і жанчыны ў перыяд менапаўзы, у якіх гарманальныя змены робяць скуру больш сухою.

Толькі мяккія ачышчальныя сродкі неабходна выкарыстоўваць людзям, якія пакутуюць на экзэму, а таксама тым, хто шмат пацее з-за актыўных трэніровак і мае рэгулярны кантакт сваёй скуры са скурай іншых (напрыклад, наведвае баксёрскія залы ці займаецца адзінаборствамі).

Аднак нават у выпадку з ачышчальнымі сродкамі важна іх выбіраць правільныя і пазбягаць празмернага выкарыстання. Спецыялісты рэкамендуюць пры выбары шукаць тыя, на этыкетцы якіх пазначана «pH-збалансаваны». Пры гэтым цвёрдыя клінсеры лепшыя за вадкія гелі для душа.

Пазбягаць варта тых, у якіх у складзе маюцца агрэсіўныя інгрэдыенты, такія як: пенаўтваральнікі (лаўрылсульфат натрыю, какамідапрапілбэтаін), якія могуць перасушваць скуру, а таксама араматызатары і кансерванты (напрыклад, бензілгеміфармаль), якія могуць выклікаць алергію. Перад выкарыстаннем лепш пратэставаць новы ачышчальны сродак на перадплеччы, каб пераканацца, што інгрэдыенты не выклічуць рэакцыю.

Некаторыя дэрматолагі лічаць, што нават клінсеры не варта выкарыстоўваць для ўсяго цела кожны дзень. Яны рэкамендуюць выкарыстоўваць іх толькі для падпах, пахвіны і ног.

Некаторыя дэрматолагі выказваюцца яшчэ больш катэгарычна. Яны рэкамендуюць выкарыстоўваць клінсеры ў душы толькі тады, калі сапраўды ёсць забруджванні, але не штодня. У большасці выпадкаў для ачышчэння скуры дастаткова звычайнай вады.

Гэты падыход звязаны з так званай гігіенічнай гіпотэзай. Некаторыя вучоныя лічаць, што залішняе ачышчэнне скуры ў апошнія дзесяцігоддзі прывяло да зніжэння карысных бактэрый, што, у сваю чаргу, магло павялічыць распаўсюджанасць алергій і інфекцый.

Выключэнне для рук

Дэрматолагі лічаць мыла неабходным толькі для мыцця рук, але не для душа.

Пасля пастаяннага кантакту з людзьмі, поручнямі ў метро, ​​прыбіральнямі і іншымі забруджанымі паверхнямі часам патрабуецца больш інтэнсіўнае выдаленне мікробаў, і ў такіх выпадках лепш выкарыстоўваць мыла.

Як тлумачаць спецыялісты, скура на руках больш тоўстая, чым на большасці частак цела, таму яна менш схільная да перасушвання ад частага кантакту з мылам.

• 7
• 1
• 1
• 3
• 0
• 0
• 0
• 0