У Баранавічах людзі ганяюцца за таннымі ёгуртамі, але не ўсім шчасціць іх здабыць
У Баранавічах узнік ажыятаж вакол танных ёгуртаў, якія мясцовыя называюць «пераходамі», піша выданне BGMedia.
«Пераходы» — гэта прадукцыя фабрыкі «Савушкаў прадукт», якая вырабляецца падчас змены адной фруктовай дабаўкі на іншую — напрыклад, «клубніца-маліна» або «груша-банан». Такія ёгурты і тварагі не паступаюць у звычайныя крамы і прадаюцца значна танней, аднак па якасці і свежасці яны не саступаюць стандартнай прадукцыі.
Раней «пераходы» можна было купіць у краме «Верас» на вуліцы Камсамольскай па цане 46—64 капейкі, але краму закрылі, выклікаўшы незадаволенасць жыхароў. Дырэктар вытворчага філіяла «Савушкаў прадукт» у Баранавічах Віктар Ракуць патлумачыў, што закрыццё звязана з нізкай прыбытковасцю крамы, а сродкі перанакіравалі на будаўніцтва новай сталовай і буфета на тэрыторыі самога прадпрыемства, дзе таксама прадаюцца «пераходы».
Цяпер людзі штодня ходзяць у буфет «Савушкавага» на вуліцы 50 гадоў БССР, але партыі ёгуртаў абмежаваныя, і іх з’яўленне непрадказальнае. Жыхарам раяць прыходзіць рана, бо пасля 11‑й гадзіны прадукцыя ўжо раскуплена, а работнікі прадпрыемства абслугоўваюцца ў прыярытэтным парадку. Таксама выклікае незадаволенасць дзейнасць перакупшчыкаў, якія скупляюць ёгурты вялікімі партыямі.
Цяпер чытаюць
Зяленскі: Рэтранслятары на мяжы Беларусі прыпынілі працу69
Каментары