Фермеры, у якіх летась дашчэнту згарэла ферма з каровамі, не могуць пабудаваць новую праз супраціў суседа

Паводле слоў Таццяны і Фёдара Сянько, у 2019 годзе Мінскі райвыканкам выдзеліў ім зямлю для вядзення фермерскай гаспадаркі. Паступова гаспадарка развівалася: сям’я трымала каля 300 авечак і 15 кароў.

Фермеры сцвярджаюць, што праблемы пачаліся пасля таго, як у 2022 годзе побач пасяліўся новы сусед. Паводле іх слоў, пасля яго шматлікіх зваротаў да іх сталі рэгулярна наведвацца розныя кантрольныя службы.

Сям’я запэўнівае, што ўсе праверкі не засведчылі сур’ёзных парушэнняў. Самі ж яны ішлі насустрач — па просьбе суседа нібыта нават адмовіліся ад развядзення авечак, пакінуўшы толькі кароў і курэй, аднак скаргі працягнуліся.

Павялічыць

Пасля пажару Сянько пачалі рыхтавацца да будаўніцтва новых памяшканняў для захоўвання сена і ўтрымання жывёлы.

Паводле іх слоў, як толькі былі закупленыя будаўнічыя матэрыялы, сусед адразу звярнуўся ў адпаведныя органы са скаргай, хоць праект яшчэ не быў зацверджаны. Цяпер сям’я чакае дазволу на ўзвядзенне часовага збудавання для захоўвання сена і лічыць, што разгляд дакументаў зацягваецца праз пастаянныя скаргі.

Фермеры гавораць, што крымінальная справа па факце пажару ўсё яшчэ расследуецца. Яны адзначаюць, што падазраваныя пакуль не ўстаноўленыя. Паводле іх слоў, сусед разглядаўся як адзін з магчымых падазраваных, але сабраныя матэрыялы не пацвердзілі яго датычнасці. Расследаванне гэтай справы пакуль не завершана і следчыя дзеянні працягваюцца.

Павялічыць

Сам жа сусед, якога завуць Антон, сцвярджае, што не выступае супраць фермерскай дзейнасці як такой. Аднак ён лічыць, што гаспадарчыя пабудовы не павінны размяшчацца ў межах жылой забудовы. Паводле яго слоў, асноўнымі праблемамі сталі непрыемны пах, вялікая колькасць мух і выпас жывёлы паблізу жылых дамоў.

Мужчына заяўляе, што неаднаразова прапаноўваў перанесці кароўнікі далей ад жылых участкаў. Ён таксама сцвярджае, што праверкі сапраўды выяўлялі парушэнні, звязаныя з размяшчэннем гаспадарчых пабудоў без неабходных узгадненняў і санітарных адлегласцяў.

Павялічыць

Сваю датычнасць да пажару Антон катэгарычна адмаўляе. Ён сцвярджае, што ў ноч здарэння знаходзіўся дома, а сістэма відэаназірання можа пацвердзіць яго алібі. Паводле яго слоў, звароты ў пракуратуру, санітарныя службы і міліцыю былі выкліканы выключна жаданнем абараніць свае правы.

Сітуацыя цяпер знаходзіцца на кантролі Мінскага райвыканкама. Старшыня райвыканкама Дзяніс Калясень асабіста наведаў месца канфлікту і сустрэўся з усімі бакамі. Паводле яго слоў, галоўная задача цяпер — знайсці рашэнне, якое будзе адпавядаць заканадаўству і задаволіць як фермераў, так і іх суседа.

Павялічыць

Цікава, што, як сцвярджае чыноўнік, сусед Антон нават выказаў гатоўнасць фінансава дапамагчы ў будаўніцтве новай фермы, але пры ўмове, што яна будзе размешчана далей ад жылых дамоў.

Цяпер спецыялісты вывучаюць магчымыя варыянты размяшчэння новых гаспадарчых пабудоў. Сям’я Сянько чакае неабходных дазволаў, сусед спадзяецца на паляпшэнне ўмоў жыцця, а следчыя працягваюць працу над раскрыццём абставін пажару.

• 1
• 0
• 0
• 6
• 0
• 1
• 1
• 0