На волю выйшла Таццяна Канеўская — былая давераная асоба Ціханоўскай
Былая давераная асоба Святланы Ціханоўскай падчас прэзідэнцкай кампаніі 2020 года Таццяна Канеўская адбыла ўвесь тэрмін пакарання. Дома жанчыну чакаў няпоўнагадовы сын, піша «Гомельская вясна».
Таццяна Канеўская была даверанай асобай Святланы Ціханоўскай падчас прэзідэнцкай кампаніі 2020 года. У жніўні таго ж года пасля ператрусаў у яе доме Таццяну затрымалі. Яе абвінавацілі паводле арт. 293 КК («масавыя беспарадкі») і арт. 292 КК («захоп будынкаў»).
4 мая 2021 года суд прызначыў жанчыне 6 гадоў пазбаўлення волі.
Падчас адбывання пакарання Канеўскую неаднаразова змяшчалі ў ШІЗА і ПКТ, у 2022 годзе перавялі на турэмны рэжым у Магілёў. Па інфармацыі праваабаронцаў, яна была абмежаваная ў спатканнях і перадачах, мела праблемы са здароўем.
Таццяна прыйшла ў грамадзянскі актывізм праз барацьбу за свайго сына, асуджанага паводле наркатычнага артыкула. Яна была адной з прадстаўніц ініцыятывы «Матчын рух 328», выступала за змякчэнне антынаркатычнага заканадаўства і ініцыявала галадоўку маці асуджаных. У 2019 годзе балатавалася ў дэпутаты.
Каментары