У Беларусі закрываюць яшчэ адну прыватную ВНУ — Інстытут парламентарызму і прадпрымальніцтва (ІПП), які знаходзіўся ў Мінску і працаваў з 1993 года. ВНУ афіцыйна паведаміла пра заканчэнне сваёй дзейнасці.
Прычыны закрыцця ў паведамленні не ўдакладняюцца. Раней, у лютым 2021 года, інстытут прайшоў дзяржаўную акрэдытацыю, тэрмін якой заканчваецца 9 сакавіка 2026 года. Верагодна, атрымаць новую акрэдытацыю ІПП не змог.
Улетку 2024 года ўніверсітэт ужо абвяшчаў, што не будзе прымаць першакурснікаў, бо Міністэрства адукацыі не ўзгадніла набор. Пры гэтым тады падкрэслівалася, што ўстанова працягвае працу. Цяпер жа абвешчана менавіта пра закрыццё.
ІПП рыхтаваў спецыялістаў у галіне эканомікі, кіравання і паліталогіі. Студэнты, паводле ранейшай практыкі, пры закрыцці прыватных ВНУ маглі працягнуць навучанне ў іншых установах з асабістай згоды або згоды законных прадстаўнікоў.
У апошнія гады ў Беларусі ўжо закрываліся некаторыя прыватныя ўніверсітэты, і колькасць такіх устаноў паступова скарачаецца.
У 2024 годзе ў краіне спынілі працу адразу два прыватныя ўніверсітэты: БІП — Універсітэт права і сацыяльна-інфармацыйных тэхналогій і Інстытут прадпрымальніцкай дзейнасці.
Да 2026 года ў Беларусі заставалася пяць прыватных ВНУ: акрамя ІПП, гэта Міжнародны ўніверсітэт «МИТСО» (Мінск, а таксама філіялы ў Гомелі і Віцебску), Беларускі гандлёва-эканамічны ўніверсітэт спажывецкай кааперацыі (Гомель), Інстытут сучасных ведаў імя А. М. Шырокава (Мінск), Міжнародны інстытут кіравання і прадпрымальніцтва (Мінск).
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны22
Каментары