Аднак да памеру ў $500 яшчэ далёка.
У Беларусі з 1 верасня 2010 падвышаныя тарыфныя аклады асобным катэгорыям работнікаў бюджэтных арганізацый, паведамілі агенцтву «Інтэрфакс-Захад» у апараце Савета міністраў.
Паводле пастановы ўрада №1267, стаўкі педагагічных работнікаў бюджэтных арганізацый (за выключэннем прафесарска-выкладчыцкага складу вышэйшых навучальных установаў і ўстановаў адукацыі, якія забяспечваюць павышэнне кваліфікацыі і перападрыхтоўку кадраў, а таксама тарыфныя аклады дактароў падвышаныя на 25%.
На 15% павышаюцца аклады работнікаў установаў сацыяльнага абслугоўвання і работнікаў культурна-асветніцкіх установаў.
Стаўкі маладых спецыялістаў, якія атрымалі вышэйшую і сярэднюю спецыяльную адукацыю, накіраваных на працу па размеркаванні ў бюджэтныя арганізацыі, з 1 верасня павялічаныя на 10%.
Пастановай таксама ўсталяваныя карэктавальныя каэфіцыенты да разлічаных па адзінай тарыфнай сетцы работнікаў Беларусі тарыфных ставак работнікаў бюджэтных арганізацый, якія тарыфікуюцца 1-27 разрадамі, у памеры 2,862-0,978.
Пра магчымае павышэнне з 1 верасня заробкаў нізкааплатных катэгорый работнікаў бюджэтных арганізацый заяўляў прэм'ер-міністр Беларусі Сяргей Сідорскі ў канцы жніўня падчас сустрэчы з прафсаюзным актывам, а таксама на нарадзе ў прэзідэнта па сацыяльна-эканамічным развіцці Беларусі ў гэтым годзе і напрамках росту эканомікі ў 2011—2015.
На нарадзе ў прэзідэнта С. Сідорскі таксама прапанаваў павялічыць з 1 лістапада тарыфную стаўку I разраду з Br90 тыс. да Br180 тыс. для павышэння заробкаў усім астатнім катэгорыям бюджэтнікаў.
Як паведамлялася, прэзідэнт Беларусі патрабуе ад урада дасягнуць да канца года сярэдняй заработнай платы ў бюджэтнай сферы ў памеры $410 у эквіваленце, у народнай гаспадарцы - $500. Цяпер сярэдняя зарплата бюджэтнікаў складае каля $200 у эквіваленце.
У сувязі з планамі павышэння зарплаты ўрад прапаноўвае прэзідэнту пагадзіцца з падваеннем дэфіцыту бюджэту ў гэтым годзе - да 3% ВУП з 1,5% ВУП, прадугледжаных законам аб бюджэце. Па ацэнцы ўрада, для забяспечання запланаванага падвышэння зарплаты ў бюджэтнай сферы дадаткова спатрэбіцца Br6,6 трлн, што складае 17,3% выдаткаў рэспубліканскага бюджэту, прадугледжаных законам аб бюджэце.
Каментары