Польшча ўводзіць санкцыі супраць Лукашэнкі і некалькіх соцень чыноўнікаў
Паколькі краіна ўваходзіць у Шэнгенскую зону, іншыя краіны таксама не могуць выдаваць візаў Лукашэнку і яго падначаленым.
Польшча падрыхтавала візавыя санкцыі адносна прэзыдэнта Беларусі Аляксандра Лукашэнкі і некалькіх соцень прадстаўнікоў ягонага рэжыму.
Як неафіцыйна паведамляюць дыпляматычныя крыніцы ў Польшчы, у МЗС гэтай краіны гатовы сьпіс прозьвішчаў асоб, адказных за рэпрэсіі, што пачаліся пасьля выбараў 19 сьнежня: пракурораў, судзьдзяў, чыноўнікаў, супрацоўнікаў спэцыяльных службаў.
Вядома, што ў гэтым сьпісе некалькі соцень прозьвішчаў, уключна з А. Лукашэнкам. Аднак пакуль МЗС Польшчы не публікуе цалкам гэты сьпіс і не падае дакладнага ліку асоб, якія патрапяць пад санкцыі. Аднак вядома, што пад санкцыі не патрапіць міністар замежных спраў Беларусі Сяргей Мартынаў, каб не абмяжоўваць магчымасьцяў дыялёгу.
Аналягічныя санкцыі ад імя ўсяго Эўразьвязу чакаюцца 31 студзеня.
Каментары