Тэлевізійнікі прывучылі гледачоў да кадраў, калі ўдзельнікі акцыі 19 снежня каюцца. На гэтым фоне кантраставаў допыт актывіста Паўла Вінаградава.
Тэлевізійнікі прывучылі гледачоў да кадраў, калі ўдзельнікі акцыі 19 снежня каюцца.
Можна здагадацца, што такія прызнанні выбіваюць псіхалагічным ціскам.
На гэтым фоне заўважна кантраставаў допыт актывіста Паўла Вінаградава. Кадры з яго дэманстравалі тэлеканалы АНТ і БТ.
Вінаградаў менш за ўсё быў падобны да зломленага чалавека. На ўсе пытанні следчага адказваў з усмешкай і іроніяй. Кажа, маўляў, не пашанцавала яму пры такім кіраўніку нарадзіцца, вось і выпраўляе сітуацыю.
Або сказаў:
«Мне здаецца, што пагром Дома ўрада пачалі апранутыя ў цывільнае міліцыянты, але доказаў гэтага ў мяне няма».
Паўлу Вінаградаву 22 гады. Ён мінчук, скончыў музычную школу. Доўгі час быў блізкі да «Еўрапейскай Беларусі». У 2008 годзе прайшоў праз крымінальную справу, якая атрымала назву «Працэс чатырнаццаці».
Тады Паша быў асуджаны на два гады «хіміі» без накіравання ў папраўчыя калоніі. Хлопец цалкам адбыў пакаранне, а не з’ехаў з краіны.
Падчас гэтай выбарчай кампаніі далучыўся да каманды Уладзіміра Някляева. Вінаградаў і ў дождж, і ў холад стаяў з пікетам ля крамы «Акіян», што ля плошчы Перамогі.
Сябра штаба Някляева Міхась Пашкевіч кажа, што «Вінаградаў як ніхто іншы якасна адпрацаваў кампанію». Яго ў вялізных навушніках можна было пастаянна бачыць за спінай паэта.
Цяпер жа хлопец дэманструе публічна сваю нязломную пазіцыю.
Каментары