Чарговы раз быў дапытаны актывіст Маладога Фронту Юльян Місюкевіч.
З лекцыі юнака выклікалі ў дэканат фізічнага факультэта БДУ, дзе навучаецца хлопец. Праз нейкі час туды падышлі супрацоўнікі КДБ і адвезлі яго ў будынак КДБ для допыту у якасці сведкі па крымінальнай справе аб так званых «беспарадках 19 снежня». Падобным чынам юнака прывозілі на допыт 6 студзеня, пасля чаго хлопец на 12 сутак апынуўся ў турме.
У мінулы раз чэкісты вазілі яго ўчатырох, гэтым разам у машыне сядзелі толькі тры супрацоўнікі Камітэта.
Маладафронтаўцу давялося прыблізна гадзінку чакаць, пакуль вызваліцца следчы і пачнецца допыт. За гэты час маёр Дзем’яновіч, які раней кіраваў вобшукам на кватэры хлопца, пачаставаў юнака каваю з шакаладкаю. Непасрэдна допыт праводзіў следчы КДБ Бычак, які ў той жа дзень дапытваў жонку Алеся Кіркевіча Надзею Крапівіну.
«Пра што мяне пытаў сьледчы казаць не буду, бо даваў падпіску аб неразгалошванні. Але магу сказаць, аб чым не пытаў. Супрацоўнікаў КДБ падчас сённяшняй гутаркі не цікавіла, ці бачыў я, хто біў шкло на плошчы Незалежнасці, ці магу іх апазнаць», — апавядае маладафронтавец.
Допыт цягнуўся дзве гадзіны.
Каментары