Арганізатары фэсту абяцаюць, што слухачы пачуюць дударскую музыку ў розных музычных кірунках — ад рок‑музыкі да мужчынскіх сьпеваў пад дуду. У фэстывалі заяўлены з два дзясяткі камандаў…
У Беларусі хутка пашыраецца грамадзкі рух па вяртаньні аднаго з самых старажытных і містычных беларускіх інструмэнтаў — дуды (беларускай валынкі).
Чарговы — «Дударскі фэст 2007» — адкрыецца 20 красавіка ў Мінску. Гэта вялікая сустрэча беларускіх дудароў пры ўдзеле гасьцей з Польшчы і Літвы.
На фэстывальнай сцэне будуць гучаць беларускія, галісійскія, шатляндзкія, швэдзкія і латыскія дуды. У фэстывалі будзе прадстаўлена дударская музыка ўсіх кірункаў — ад традыцыйнага фальклёру і да року з дудамі.
Гурт «Стары Ольса» выканае сярэднявечныя эўрапейскія танцы і старадаўнія беларускія песьні.
Рок‑гурт Litvintroll выступіць у акустыцы з сапраўднай шатляндзкай дудой.
«Келіх кола» прадставіць публіцы беларускі і латгальскі фальклор 30‑х гадоў — спалучэньне беларускіх дудаў зь нямецкім акардэёнам.
Дудары Юрась Панкевіч і Дзяніс Сухі прадставяць рэканструкцыю аўтэнтычнай беларускай манэры граньня на дудзе.
Магілёўскі гурт «За парогам» пакажа галісійскую дуду.
Гурт «Ліцьвінскі хмель» і «Testamentum terrae» (Менск) выступяць на фэстывалі з праграмай, дзе будзе прадстаўлена і беларуская, і эўрапейская дударскія традыцыі.
У фэсьце будзе ўдзельнічаць адзін з самых паважаных беларускіх майстроў дуды — Алесь Лось, які са сваёй капэляй выканае дударскую музыку розных рэгіёнаў Беларусі.
Гурт Ceilidh Ceol сыграе традыцыйную ірляндзкую і шатляндзкую музыку. Свае традыцыі прадставяць аўтэнтычныя музыкі з Польшчы і Літвы.
Фальклёрны гурт «Кудзьмень» пазнаёміць публіку зь беларускай дударскай музыкай у спалучэньні з традыцыйнымі беларускімі мужчынскімі сьпевамі.
Даведкі: 6490888, 7662425
Цяпер чытаюць
Прапаганда рыхтуе грамадства да загадкавай «працяглай камандзіроўкі» Лукашэнкі39
Каментары