Imitacyja dyplamatyi

Pasoł Rasiei ŭ Biełarusi — pieraškoda na šlachu intehracyi.

Rasieja, narešcie, vyznačyłasia. Pašukaŭšy paŭhodu na biaskrajnich svaich absiahach adnaho čałavieka, jaki byŭ by hatovy stać rasiejskim pasłom u Miensku. Znajšli. Heta Alaksandar Surykaŭ. Jon jašče pakryŭdzić Łukašenku nie paśpieŭ. Dyj naŭrad ci naahuł jon budzie kaho kryŭdzić na svajoj novaj pasadzie. Byłoha hubernatara dalokaha Ałtajskaha kraju, što lažyć niedzie ŭ sercy Azii, viedajuć jak čałavieka pamiarkoŭnaha j biezynicyjatyŭnaha.

Tym časam Dzimitry Ajackaŭ, jaki i ŭ svajoj Sarataŭskaj vobłaści na viarbludach hojsaŭ, raźbiraŭsia sa svajoj majomaściu. Jahonyja hubernatarskija charomy, ź jakich paprapadała santechnika j dźviarnyja klamki, demanstravali pa rasiejskim telebačańni nie raŭnujučy jak piačoru Aladyna. Paŭhodu pajšli ŭ Ajackava na razborki z padatkavikami, prystavami, milicyjaj. Pakryŭdžany Ajackavym Łukašenka pilna sačyŭ za losam svajho kryŭdziciela. Patron Biełarusi asabista pacikaviŭsia jahonym dalejšym losam.

I hety los skłaŭsia jak najlepiej. Vynyrnuŭšy z usich skandałaŭ (i palityčnych, i z santechnikaj u svaim hubernatarskim majontku), jon uspłyŭ na pasadzie namieśnika pradstaŭnika Pucina ŭ Pryvołskaj federalnaj akruzie Siarhieja Kiryjenki. Zvažajučy na pamiery taje federalnaje adzinki j na jaje ekanamičny patencyjał, Ajackaŭ, biezumoŭna, vyjhraŭ — materyjalna j maralna. Daŭšy Łukašenku pstryčku pa łbie, zasłužyŭ spakojnaje mieściejka.

Tym časam navat biez prysutnaści pasła «intehracyja» praciahvałasia. Bolš za toje, mienavita ź jaho adsutnaściu pačałosia ažyŭleńnie tak zvanaha «pracesu stvareńnia sajuznaje dziaržavy»!.. Prajekt «kanstytucyjnaha aktu» hetaj «dziaržavy» maje być pradstaŭleny na razhlad najvyšejšych jaje orhanaŭ 15 listapada. Rasiejskija ŚMI paśpiašalisia pryznačyć na sakavik referendum, dalej — vybary ŭ «sajuzny parlamant» i vybrańnie prezydenta ŭsiesajuznaje dziaržavy! Choć siońniašni varyjant aktu hetaha nie praduhledžvaje, ale chto skazaŭ, što jon apošni j nieparušny? Zakony, kanstytucyi j praviły hulni ŭ Miensku mianiajucca časta. Moža, kali vy čytajecie hetyja radki, užo źmianilisia j terminy «realizacyi» dy formy «intehracyi».

Pra «sajuz» havorać hetak daŭno, što ŭžo mała chto pomnić, chto ŭsio pačaŭ. Pahatoŭ, u narodu ŭsio mienš razumieńnia, našto toj «sajuz» patrebny, kali ŭsio ž niejak žyviom i bieź jaho. A pavodle Łukašenki, žyviom lepš čym chto…

Pa-druhoje: nichto: ni palitolahi, ni analityki, ni prezydenty — nia zdoleŭ adkazać na pytańnie, što heta budzie za ŭtvareńnie? Da čaho padobnaje? Kali da SSSR — heta my ŭžo prachodzili ŭ škole. Kali da Eŭraźviazu — to ci nie praściej tudy ž imknucca j bratanam-słavianam? Kali da kurtataj SND — to navošta stolki lišniaha tłumu?

Nu i hałoŭnaje: chto skazaŭ, što Łukašenka ŭ vypadku źjaŭleńnia pasady prezydenta «Sajuzu» bačyć na hetaj pasadzie kaho-niebudź, aproč siabie? Heta vydatna razumieje i Pucin, i ŭvieś rasiejski bamond. Łukašenka vydatna ŭpisvajecca ŭ rolu pradstaŭnika elektaratu Ziuhanava j Žyrynoŭskaha, ale jon kudy macniejšy za ich. Jon macniejšy j za Pucina, jaki niazdatny j na pałovu taje biezapelacyjnaj demahohii, jakoj Łukašenka zavalvaje biełaruskuju medyjnuju prastoru. Nie raźbić, nie spynić, nie strymać…

Tamu maskoŭskija palityki znoŭ prytarmožvajuć. Pakul budzie Łukašenka, intehracyja ź Mienskam budzie taić u sabie vielizarnuju niebiaśpieku dla samoj Rasiei. A tamu, pakul ździejśniacca tyja abiacanki-cacanki, jakim radujucca Łukašenkavy vybarcy, Rasieja budzie mieć paŭnavartasnyja dyplamatyčnaje adnosiny ź nievialikaj krainaj na svaich zachodnich miežach. Pry tym treba praciahvać burna imitavać burnaje słavianskaje braterstva. I na hety «šery» peryjad asoba A.Surykava nadajecca jak najlepiej. Budučy rasiejski pasoł — čałaviek uraŭnavažny, abačlivy j aściarožny ŭ svaich vykazvańniach. Prynamsi, jon budzie takim, pakul nie pažyvie ŭ Miensku.

• 0
• 0
• 0
• 0
• 0
• 0
• 0
• 0