Polski sud admianiŭ datu pieradačy ŭ Biełaruś siamihadovaha chłopčyka ź mižnarodnaj abaronaj

Siamihadovaha Alesia, jakim apiakujecca Hanna Kanavałava, maci byłoj palitźniavolenaj Antaniny Kanavałavaj, musili pieradać bijałahičnamu baćku ŭ Biełaruś 27 červienia. Adnak polski sud admianiŭ datu pieradačy, napisała ŭ fejsbuku Hanna Kanavałava, pieradaje «Biełsat».

Sud razhledzieŭ apielacyju, jakuju padavała apiakunka dziciaci. Hanna Kanavałava źviarnułasia sa słovami padziaki da pravaabaroncaŭ, jurystaŭ, žurnalistaŭ, hramadskich arhanizacyj, siabroŭ, «znajomych i nieznajomych ludziej, jakija pisali, telefanavali, raspaŭsiudžvali infarmacyju i dapamahali ŭsimi mahčymymi sposabami».

U svaim paście biełaruska adznačyła Śviatłanu Cichanoŭskuju, kiraŭnika NAU, namieśnika kiraŭnicy Abjadnanaha pierachodnaha kabinietu Paŭła Łatušku, jurystku Hannu Macijeŭskuju, žurnalistku Irynu Chalip, polskaha abmudsmiena ŭ pravach dziciaci, arhanizacyi Amnesty International Polska, Helsińska Fundacja Praw Człowieka.

«Hetaja pieramoha naležyć nam usim, chto vieryć. Napieradzie jašče baraćba, ale naš małyš zastajecca ŭdoma, pobač ź ludźmi, jakich ličyć svajoj siamjoj. Razam my damahlisia taho, što jašče niekalki dzion tamu zdavałasia amal niemahčymym», — napisała Hanna Kanavałava.

Raniej Varšaŭski sud pastanaviŭ pieradać siamihadovaha chłopčyka ź Biełarusi, jaki žyvie ŭ pryjomnaj siamji ŭ Polščy, bijałahičnamu baćku, jaki znachodzicca ŭ Minsku. Pry hetym u chłopčyka jość mižnarodnaja abarona, jakaja zabaraniaje jaho vysyłku na radzimu.

Aleś razam z maci i starejšym zvodnym bratam Jaŭhienam, jakomu ŭ toj čas było 14 hadoŭ, pryjechaŭ ź Biełarusi ŭ Polšču ŭ 2021 hodzie paśla pratestaŭ. Siamja atrymała mižnarodnuju abaronu ŭ Polščy.

Polskija orhany apieki chutka daviedalisia pra ałkaholnuju i narkatyčnuju zaležnaści žančyny, a taksama pra toje, što jana zajmajecca prastytucyjaj, i zabrali dziaciej ź siamji. Ich usynaviła inšaja biełaruska — piensijanierka Hanna Kanavałava, jakaja raniej pracavała pradavačkaj mebli, i zaraz žyvie ŭ varšaŭskim rajonie Makotuv. Jana dahladała dvuch unukaŭ 6 i 8 hadoŭ, pakul ichnaja maci Antanina Kanavałava, asudžanaja pavodle palityčnych matyvaŭ, adbyvała pakarańnie ŭ Biełarusi.

Na momant usynaŭleńnia ŭ 2023 hodzie małodšy Aleś, jakomu było čatyry hady, nie ŭmieŭ karystacca prybiralniaj, drenna havaryŭ i byŭ zaležny ad TikTok. U 2024 hodzie ichnaja bijałahičnaja maci pamierła ad pieradazavańnia.

U žniŭni 2023‑ha da siamji źviarnuŭsia bijałahičny baćka Alesia Siarhiej, u minułym asudžany na dzieviać hadoŭ kałonii za handal narkotykami. Paśla taho, jak Hanna dapamahła Siarhieju zrabić vizu ŭ Polšču, jon pačaŭ naviedvać Alesia ŭ siarednim raz na miesiac. Jon pravodziŭ čas z synam i pryvoziŭ jamu padarunki, ale ŭ nastupnym hodzie straciŭ vizu, i jahonyja stasunki abmiežavalisia telefanavańniami, jakija, pavodle słovaŭ Hanny, taksama adbyvalisia nie čaściej za adzin raz na miesiac.

A potym mužčyna nadumaŭ viarnuć dzicia ŭ Biełaruś i źviarnuŭsia ŭ sud u Varšavie. U sakaviku 2026‑ha sud pastanaviŭ pieradać dzicia baćku. Sudździ pastanavili, što intaresy niepaŭnaletniaha «pierš za ŭsio realizujucca praz vychavańnie ŭłasnym baćkam».

Pry hetym pravaabarončy fond Partyzanka adznačaje, što dzicia atrymała mižnarodnuju abaronu ŭ Polščy mienavita praz ryzyku viartańnia ŭ Biełaruś, tamu viartacca tudy jano nie moža. Jurysty kažuć, što «kali [biełaruski] režym zachoča vykarystać dzicia ŭ prapahandysckich metach, jon zrobić heta, navat kali baćka budzie supraciŭlacca».

• 0
• 0
• 0
• 0
• 0
• 0
• 0
• 0