Irak moža stać nastupnaj paśla Abjadnanych Arabskich Emirataŭ krainaj, jakaja pakinie Arhanizacyju krain-eksparcioraŭ nafty (APIEK). Pra takuju mahčymaść zajavili vysokapastaŭlenyja pradstaŭniki irakskaha naftavaha viedamstva, piša Reuters.
Hałoŭnaja pryčyna niezadavolenaści Bahdada — dziejnaja kvota na zdabyču nafty, jakaja, na dumku irakskich uładaŭ, nie adpaviadaje realnym mahčymaściam krainy. Ciapier Iraku dazvolena zdabyvać kala 4,4 miljona baralaŭ nafty ŭ sutki. Da pačatku niadaŭniaha kryzisu na Blizkim Uschodzie kraina amal poŭnaściu vykarystoŭvała hety limit, ale paśla pierabojaŭ z pastaŭkami praź Piersidski zaliŭ zdabyča rezka ŭpała.
Novy premjer-ministr Iraka Ali az-Ziejdzi zajaviŭ, što kraina choča pierahladu svajoj kvoty z ulikam vialikich zapasaŭ nafty, vytvorčych mahčymaściaŭ i kolkaści nasielnictva. Pavodle jaho słoŭ, u najbližejšyja hady Irak płanuje pavialičyć zdabyču da siami miljonaŭ baralaŭ u sutki.
Pradstaŭniki naftavaha siektara papiaredžvajuć, što kali APIEK nie pahodzicca istotna pavialičyć kvotu, Bahdad budzie vymušany razhladać usie mahčymyja varyjanty, u tym liku i vychad z arhanizacyi.
Padobnaja situacyja ŭžo pryviała da vychadu z APIEK Abjadnanych Arabskich Emirataŭ. Emiraty taksama doŭhi čas spračalisia z Saudaŭskaj Aravijaj nakont abmiežavańniaŭ na zdabyču. Kraina vałodała značnymi svabodnymi mahutnaściami i mahła zdabyvać značna bolš nafty, čym dazvalała kvota. Na dumku ŭładaŭ AAE, heta pieraškadžała atrymlivać dadatkovyja dachody i finansavać važnyja ekanamičnyja prajekty.
Dla Iraka nafta zastajecca hałoŭnaj krynicaj dziaržaŭnych dachodaŭ, tamu pytańnie ab pavieličeńni zdabyčy maje dla krainy klučavoje značeńnie. Kali pieramovy z APIEK nie daduć žadanaha vyniku, arhanizacyja moža sutyknucca z čarhovym surjoznym vyprabavańniem svajho adzinstva i ŭpłyvu na suśvietny naftavy rynak.
Ciapier čytajuć
U Francyi ad śpioki zahinuŭ dalnabojščyk z Dokšycaŭ8
Kamientary
Ciapier, kali hrošaj mnoha, jany pačali vajavać miž saboj, vieści proksi-vojny pa ŭsim isłamskim śviecie. I treba ŭsio bolš hrošaj na heta marnavać.
Što ty nie rabi, hety "bieły djabał" ich pierajhraje. Mašałła.