Ірак можа стаць наступнай пасля Аб'яднаных Арабскіх Эміратаў краінай, якая пакіне Арганізацыю краін-экспарцёраў нафты (АПЕК). Пра такую магчымасць заявілі высокапастаўленыя прадстаўнікі іракскага нафтавага ведамства, піша Reuters.
Галоўная прычына незадаволенасці Багдада — дзейная квота на здабычу нафты, якая, на думку іракскіх уладаў, не адпавядае рэальным магчымасцям краіны. Цяпер Іраку дазволена здабываць каля 4,4 мільёна бараляў нафты ў суткі. Да пачатку нядаўняга крызісу на Блізкім Усходзе краіна амаль поўнасцю выкарыстоўвала гэты ліміт, але пасля перабояў з пастаўкамі праз Персідскі заліў здабыча рэзка ўпала.
Новы прэм'ер-міністр Ірака Алі аз-Зейдзі заявіў, што краіна хоча перагляду сваёй квоты з улікам вялікіх запасаў нафты, вытворчых магчымасцяў і колькасці насельніцтва. Паводле яго слоў, у найбліжэйшыя гады Ірак плануе павялічыць здабычу да сямі мільёнаў бараляў у суткі.
Прадстаўнікі нафтавага сектара папярэджваюць, што калі АПЕК не пагодзіцца істотна павялічыць квоту, Багдад будзе вымушаны разглядаць усе магчымыя варыянты, у тым ліку і выхад з арганізацыі.
Падобная сітуацыя ўжо прывяла да выхаду з АПЕК Аб'яднаных Арабскіх Эміратаў. Эміраты таксама доўгі час спрачаліся з Саудаўскай Аравіяй наконт абмежаванняў на здабычу. Краіна валодала значнымі свабоднымі магутнасцямі і магла здабываць значна больш нафты, чым дазваляла квота. На думку ўладаў ААЭ, гэта перашкаджала атрымліваць дадатковыя даходы і фінансаваць важныя эканамічныя праекты.
Для Ірака нафта застаецца галоўнай крыніцай дзяржаўных даходаў, таму пытанне аб павелічэнні здабычы мае для краіны ключавое значэнне. Калі перамовы з АПЕК не дадуць жаданага выніку, арганізацыя можа сутыкнуцца з чарговым сур'ёзным выпрабаваннем свайго адзінства і ўплыву на сусветны нафтавы рынак.
Цяпер чытаюць
У Беларусі множацца пляцоўкі для танцаў на свежым паветры — паглядзіце, як адпальваюць разам моладзь і пенсіянеры ў Серабранцы7
Каментары
Цяпер, калі грошай многа, яны пачалі ваяваць між сабой, весці проксі-войны па ўсім ісламскім свеце. І трэба ўсё больш грошай на гэта марнаваць.
Што ты не рабі, гэты "белы д'ябал" іх перайграе. Машалла.