Dvuchmietrovaja kampazicyja cmoka źjavicca ŭ Lepieli sioleta ŭ vieraśni na Dzień horada.
Cmok — biełaruski drakon, jaki stanie simvałam Lepielskaha kraju.
U biełaruskaj i polskaj mifałohii cmok źjaŭlaŭsia uładarom ziamnych i niabiesnych vod, tamu miescam jaho pražyvańnia byli bałoty i aziory, a simvałam — viasiołka.Ab cmokach možna pračytać u viadomaha biełaruskaha etnohrafa Mikałaja Nikifaroŭskaha, pra ich zhadvaŭ daśledčyk kultury słavianskich narodaŭ Alaksandr Afanaśjeŭ. Adnak najbolšuju viadomaść cmoki atrymali dziakujučy ramanu Uładzimira Karatkieviča «Chrystos pryziamliŭsia ŭ Harodni». Mienavita ŭ kłasika napisana, što miescam pražyvańnia apošniaha biełaruskaha cmoka było adno ź lepielskich azior. Voś i vyrašyli na Lepielščynie, što turystyčnym simvałam rajona pa pravu moža ličycca heta lehiendarnaja istota. Da taho ž, u adroźnieńnie ad ruskaha svajaka Źmieja Harynyča i zachodniejeŭrapiejskaha Drakona, u biełaruskaha cmoka charaktar byŭ kudy bolš pamiarkoŭny: ad jaho dastavałasia tolki pjanicam, chulihanam dy raspuśnicam, a voś siamiejnyja pary, jakija žyvuć u lubvi i zhodzie, mahli raźličvać na jaho padtrymku.
Skulpturny vobraz lepielskaha cmoka budzie adpaviadać apisańniu Uładzimira Karatkieviča: pačvara ź ciulenievym tułavam i hałavoj ci to źmiai, ci to łani.Pavodle słoŭ Volhi Machanienka, usie nieabchodnyja dakumienty na ŭstanoŭku skulptury litaraturnaha piersanaža ŭzhodnieny ŭ Ministerstvie kultury. Jak čakajecca,
dvuchmietrovaja kampazicyja źjavicca ŭ Lepieli ŭ vieraśni hetaha hoda na Dzień horada.
Adnak tolki stvareńniem pomnika cmoku ŭ Lepieli nie majuć namieru abmiažoŭvacca. Jak tolki skulptura budzie ŭstanoŭlena, jaje tyražavańniem u vyhladzie suvieniraŭ zojmucca miascovyja majstry narodnych promysłaŭ. Rajonny krajaznaŭčy muziej, vyvučyŭšy niamała falkłornych materyjałaŭ, užo stvaryŭ animacyjnuju hulniu «U haściach u cmoka».
Prajekt «Ludzi ŭ źnikajučym łandšafcie: raźvićcio ahraturyzmu ŭ Biełarusi i Rasii» nakiravany na raźvićcio turyzmu i ahraekaturyzmu i pryciahnieńnie da hetaha pracesu miascovych supolnaściej. Jon achoplivaje terytoryi Lepielskaha rajona (uklučajučy Biarezinski bijaśfierny zapaviednik) u Biełarusi, a taksama Paleskaha rajona (i zapaviednik «Kuršskaja kasa») Kalininhradskaj vobłaści Rasii.
Na realizacyju prajekta ES nakiroŭvaje bolš jak paŭmiljona jeŭra. Srodki buduć nakiravany na raźvićcio turystyčnych maršrutaŭ, padtrymańnie sietki ahrasiadzib, praviadzieńnie sieminaraŭ pa abmienu vopytam, stažyroŭki ŭ Hałandyi.Miarkujecca, što ŭ kožnym rajonie — udzielniku prahramy budzie stvorana pa adnoj madelnaj ahraekasiadzibie, prykład raboty jakich stanie asnovaj dla tych, chto ŭstupaje ŭ novy biźnies.
Kamientary