Za party ŭ hetaj unikalnaj ustanovie adukacyi siaduć 17 chłopčykaŭ i dziaŭčynak, u asnoŭnym z pravasłaŭnych siemjaŭ.
Jak paviedamiŭ BiełaPAN adkazny za suviazi sa ŚMI minskich duchoŭnych akademii i sieminaryi ijerej Sierhij Karavinski, hety prajekt realizujecca ŭ ramkach dahavora ab supracoŭnictvie pamiž Biełaruskim ekzarchatam Ruskaj pravasłaŭnaj carkvy i Ministerstvam adukacyi. Pavodle jaho słoŭ, za party ŭ hetaj unikalnaj ustanovie adukacyi siaduć 17 chłopčykaŭ i dziaŭčynak va ŭzroście 6 hadoŭ, u asnoŭnym z pravasłaŭnych siemjaŭ. Himnazija raźmiaščajecca ŭ dvuchpaviarchovym budynku byłoha dziciačaha sadka, što adnoŭleny namahańniami Śviata‑Mikoła‑Safijskaha prychodu, jaki źjaŭlajecca zasnavalnikam navučalnaj ustanovy. Navučalny praces budzie prachodzić pa vučebnych płanach pačatkovaj škoły Ministerstva adukacyi, u jakija ŭklučany ŭroki Zakonu Božaha i asnovy pravasłaŭnaj kultury. Termin navučańnia ŭ himnazii — čatyry hady. «Navučalnaja ŭstanova atrymała status himnazii, pakolki pa tradycyi ŭ hetaj navučalnaj ustanovie z uchiłam na duchoŭnaje vychavańnie vyvučajecca Zakon Božy. U nastupnym hodzie, mahčyma, nabor u pieršy kłas budzie značna bolšy, što dazvolić adkryć dva pieršyja kłasy», — skazaŭ S.Karavinski.
Pavodle jaho słoŭ, nastajaciel himnazii pratairej Alaksij Kanaploŭ i dabračyncy stvaryli ŭsie nieabchodnyja ŭmovy dla paśpiachovaha navučańnia i vychavańnia junych himnazistaŭ «na asnovie kulturnych kaštoŭnaściej biełaruskaha naroda i chryścijanskaj spadčyny». Tym nie mienš, jak zaznačyŭ S.Karavinski, navučańnie ŭ himnazii budzie ažyćciaŭlacca na ruskaj movie. Pavodle jaho słoŭ, vykładańnie biełaruskaj i zamiežnych moŭ budzie vieścisia ŭ ramkach prahramy pačatkovaj ruskamoŭnaj škoły. Jak paviedamiŭ ijerej, himnazija maje ŭtulnyja kłasy, aktavuju zału, biblijateku, trapieznuju i dvoryk.
U dzień adkryćcia navučalnaj ustanovy adbudziecca aśviačeńnie himnazičnaha chrama ŭ honar najpadobnaj mučanicy Lizaviety. Na vučobu dziaciej błahasłaviŭ archirej pravialebny Sierafim, jepiskap Babrujski i Bychaŭski. Adbudziecca ŭznaharodžańnie asob, jakija ŭziali aktyŭny ŭdzieł u stvareńni himnazii. Na pieršy zvanok zaprošany pradstaŭniki Mahiloŭskaha abłvykankama, uładaŭ Babrujska, Biełaruskaha dziaržaŭnaha univiersiteta i Minskaj duchoŭnaj akademii.
Kamientary