Mikałaj Čarhiniec pra zajavu pasła Rasiei: «Adny vystupy pavinny aceńvać palityki, a inšyja – moža, navat lekary»
«Dla taho, kab vyrašać hetaje pytańnie, treba vieści pieramovy, treba sustrakacca i abmiarkoŭvać. Nijakich razmovaŭ ni ŭnutry Biełarusi, ni na mižnarodnaj arenie, ni na biełaruska‑rasiejskich pieramovach, na hetu temu nie było. Tamu stavić heta pytańnie jak pytańnie, jakoje rašajecca ci abmiarkoŭvajecca, nielha. Tamu, što mieŭ na ŭvazie pavažany ambasadar Rasiei ŭ Miensku spadar Surykaŭ, mnie ciažka skazać, i ja dumaju, što treba źviartacca da jaho».
Karespandent: «A ci chacieła b Biełaruś mieć na svajoj terytoryi rasiejskuju jadziernuju zbroju?»
Čarhiniec: «Biełaruś nie chacieła b mieć na svajoj terytoryi jadziernuju zbroju — ni rasiejskuju, ni amerykanskuju, ni inšuju. Jana jość adzinaj krainaj u śviecie, jakaja dabraachvotna, biez usialakich umovaŭ, nie atrymaŭšy za heta ni centa, vyvieła sa svajoj terytoryi rakietnuju jadziernuju zbroju. Paśla hetaha, praŭda, byli parušeńni hetych abaviazańniaŭ z boku ZŠA, jakija abiacali dapamahčy Biełarusi ŭ likvidacyi šachtaŭ puskavych ustanovak mižkantynentalnych balistyčnych rakiet. Jany hetaha nie zrabili.
Byli niejkija paproki adnosna Biełarusi, navat naśmieški, kali jana vyłučała prapanovy ab stvareńni biaźjadziernaj zony ŭ Eŭropie, zaklikała krainy‑susiedzi ŭziać na siabie takija abaviazańni. Usio heta zastavałasia biez reakcyi. Biełaruś — biaźjadziernaja dziaržava. Jana nie planuje ŭviadzieńnia jadziernaj zbroi na svaju terytoryju. I nijakich pieramovaŭ u hetym pytańni nie viadzie».
Karespandent: Ci možna razhladać tady jak pravakacyju zajavu rasiejskaha pasła?
Čarhiniec:«Nie, ja nie skazaŭ by. U nas ža kožny maje prava vykazvać svaju dumku. Kolki nam daviałosia ciarpieć takich zajavaŭ z boku roznych palitykaŭ Eŭropy, jakija vinavaciać Biełaruś u lubych hrachach. Hetaksama i z boku amerykanskich palitykaŭ i vyšejšych słužbovych asobaŭ. Tamu my da hetaha stavimsia spakojna, z hodnaściu, razumiejučy, što kožny moža havaryć usio, što jon choča. Ale adny vystupy pavinny aceńvać palityki, a inšyja — moža, navat lekary. Tamu ja nie razhladaju heta jak pravakacyju. Kožny maje prava havaryć, u tym liku ambasadar Rasiei. Ale nijakich pieramovaŭ na hetu temu pamiž Biełaruśsiu i Rasiejaj nie viałosia i nie viadziecca».
Kamientary