Pytańni dziejnaści rezidentaŭ Parku vysokich technałohij razhledžany na pasiadžeńni Naziralnaha savieta PVT, jakoje pravioŭ 13 červienia namieśnik premjer-ministra Biełarusi Anatol Kalinin.
Pavodle infarmacyi pres-słužby ŭrada, na pasiadžeńni byli razhledžany pytańni efiektyŭnaści pracy rezidentaŭ PVT, zajavy ad jurydyčnych asob z metaj ich rehistracyi ŭ jakaści rezidentaŭ Parku.
Pa vynikach razhladu pryniatyja rašeńni pa rehistracyi piaci kampanij u jakaści rezidentaŭ PVT, admoŭlena ŭ rehistracyi adnoj kampanii.
Za nievykanańnie rezidentami PVT abaviazkaŭ, praduhledžanych dahavoram ab umovach ich dziejnaści, pryniatyja rašeńni ab pazbaŭleńni statusu rezidenta Parku čatyroch kampanij.
Asobnaja ŭvaha na pasiadžeńni była nadadziena pytańniam zabudovy terytoryi PVT i dalejšamu raźvićciu jaho infrastruktury. Anatol Kalinin ukazaŭ na niedachopy ŭ pracy Minharvykankama i Nacyjanalnaj akademii navuk u častcy kompleksnaj zabudovy terytoryi PVT, a taksama pryviadzieńni prylehłaj da jaho terytoryi ŭ naležny sanitarny stan. Dadzieny daručeńni pa ich uchileńni i dalejšym raźvićci infrastruktury PVT.
Na pačatak červienia ŭ Parku vysokich technałohij było zarehistravana 124 rezidenty, u jakich pracuje amal 14,5 tys. supracoŭnikaŭ.
U pieršym kvartale 2013 hoda abjom vytvorčaści kampjutarnych prahram i pasłuh kampanij-rezidentaŭ parku skłaŭ 863 młrd. biełaruskich rubloŭ. Temp rostu da anałahičnaha pieryjadu 2012 hoda ŭ absalutnych ličbach skłaŭ 143%, a z ulikam deflatara i źmianieńnia kursu dołara ZŠA — 134%.
Ekspart prahramnaha zabieśpiačeńnia i pasłuh za try miesiacy 2013 hoda skłaŭ 80,7 młn. dołaraŭ i pavialičyŭsia ŭ paraŭnańni z anałahičnym pieryjadam 2012 hoda na 20%. Pry hetym dola ekspartu ŭ ahulnym abjomie vytvorčaści PVT skłała 81%.
Biełaruski Park vysokich technałohij źjaŭlajecca adnym z najbujniejšych IT-kłastaraŭ u Centralnaj i Uschodniaj Jeŭropie. Pavodle acenki analityčnaj kampanii Gartner, Biełaruś uvachodzić u top-30 krain u śfiery afšornaha prahramiravańnia (vierasień 2012 hoda).
Kamientary