Śledčy kamitet Rasii zavioŭ kryminalnuju spravu na Baŭmhiertniera

Śledčy kamitet Rasii raspačaŭ kryminalnuju spravu ab złoŭžyvańni paŭnamoctvami ŭ dačynieńni da staršyni naziralnaj rady ZAT «Biełaruskaja kalijnaja kampanija» hiendyrektara AAT «Urałkalij» Uładzisłava Baŭmhiertniera i maje namier prasić ab jaho ekstradycyi ŭ Rasieju.

Jak paviedamiŭ ITAR-TASS pradstaŭnik SK RF Uładzimir Markin, «siońnia Hałoŭnym śledčym upraŭleńniem SK Rasii pa vynikach razhladu materyjałaŭ, jakija pastupili z kampietentnych orhanaŭ Respubliki Biełaruś, raspačata kryminalnaja sprava ŭ dačynieńni da staršyni naziralnaha savieta «BKK» Uładzisłava Baŭmhiertniera, byłoha pieršaha namieśnika «BKK» Kanstancina Saładoŭnikava i inšych asob pa prykmietach złačynstva, praduhledžanaha č. 2 art. 201 KK RF (złoŭžyvańnie paŭnamoctvami asobaj, jakaja vykonvaje kiraŭničyja funkcyi ŭ kamiercyjnaj ci inšaj arhanizacyi)».

«Z materyjałaŭ vynikaje, što nazvanyja kiraŭniki, vykonvajučy kiraŭničyja funkcyi ŭ kamiercyjnych arhanizacyjach, złoŭžyvali svaimi paŭnamoctvami, vykarystoŭvajučy ich nasupierak zakonnym intaresam hetych arhanizacyj i ŭ metach zdabyvańnia vyhod i pieravah dla inšych asob, što paciahnuła pryčynieńnie istotnaj škody i ciažkija nastupstvy dla «Biełaruskaj kalijnaj kampanii» i «Biełaruśkalija», — adznačyŭ Markin.

«U bližejšy čas śledčymi orhanami budzie vyrašana pytańnie ab vyniasieńni pastanovy ab pryciahnieńni ŭ jakaści abvinavačanaha i ab abrańni miery strymańnia ŭ dačynieńni da Uładzisłava Baŭmhiertniera.

Paśla čaho, z ulikam normaŭ, praduhledžanych č. 1 art. 12 KK RF, Śledčym kamitetam buduć padrychtavanyja dakumienty ab ekstradycyi Baŭmhiertniera na terytoryju Rasijskaj Fiederacyi.

U dačynieńni da inšych fihurantaŭ pa kryminalnaj spravie taksama buduć prymacca pracesualnyja rašeńni, u tym liku źviazanyja z pradjaŭleńniem abvinavačvańnia i abrańniem miery strymańnia», — dadaŭ Markin.

Pa słovach pradstaŭnika SK RF, «z ulikam taho, što ŭ materyjałach, pradstaŭlenych biełaruskim bokam, utrymlivajucca źviestki ab inšych parušeńniach, dapuščanych kiraŭnikami «Biełaruskaj kalijnaj kampanijaj» i «Urałkalijem», jany ŭ poŭnym abjomie buduć pravierany ŭ ramkach rasśledavańnia raspačataj kryminalnaj spravy, a dziejańniam asob, jakija ich učynili, budzie dadziena adpaviednaja pravavaja acenka», — adznačyŭ Markin.

Artykuł, pa jakim raspačata kryminalnaja sprava, pahražaje ad štrafa da adnaho miljona rasijskich rubloŭ da pazbaŭleńnia voli na termin da 10 hadoŭ.

«Heta, biezumoŭna, stanoŭčaja navina, — skazaŭ ITAR-TASS advakat Baŭmhiertniera Alaksiej Basistaŭ. — My raźličvajem, što ŭ vypadku ekstradycyi Baŭmhiertniera ŭ Rasiju biełaruskimi ŭładami tut jon zmoža raźličvać na spraviadlivuju acenku jaho dziejańniaŭ, jakija jamu inkryminujucca ŭ jakaści kryminalna karalnych».

• 0
• 0
• 0
• 0
• 0
• 0
• 0
• 0